No.3657/2021-2022

Aizawl, the 14th January 2022: Vawiin chawhma khan Raj Bhavan-ah Governor Hari Babu Kambhampati chuan tuna Lunglei leh Tlabung inkar kawngpui pawimawh tak siam thar hna thawktu M/s SRK Constructions and Projects Pvt.Ltd, Hyderabad, National Highways and Infrastructure Development Corporation Limited (NHIDCL) hnuaia contractor pakhat hotute a kawm a. Chak zawka hna thawh dan tur leh helai kawngpui pawimawh tak siam zawh hma dan tur a sawipui.

Governor Hari Babu Kambhampati chuan Lunglei thlang lama cheng mipuite tan Lunglei –Tlabung road hi a pawimawh em em a. He kawngpui hi siam zawh a nih hunah chuan hun rei tak chhung Lunglei thlang lama cheng ten kawngpui avanga harsatna an tawh thin te sutkian a ni dawn a. He kawngpui hi Tlabung leh Chittagong inthlunzawm theih hunah phei chuan Mizoram tan sumdawnna kawngpui pawimawh tak leh hmasawnna thlentu a ni dawn a ni a ti. He kawngpui siamthat hna thawktute chu an harsatna te leh chak zawka hna an thawh theih dan tur te zawtin a tul anga hmalakpui a tum thu a sawi a. Kawngpui siam hna thawh a nih chhung pawhin he kawngpui in a paltlang khawtualmi te hnathawh tur te siam saka, sum an thawhchhuah dan tur te ruahman pui turin contractor te hi a chah bawk a ni.

Pu S. Lallit Sanjeeva Reddy, Managing Director, M/s SRK Constructions and Projects Pvt Ltd chuan tuna kawngpui awm mek 95 Km atangin 75 Km a thuiah Lunglei- Tlabung road chu siam tum a ni tih a sawi a. Kawngpui zau zawk leh tha zawk siam tumin theih tawp an chhuah thu a sawi a; tunah hian helai kawngpui dunga a chhe lai deuh atangin hmalak mek a ni a, hna a sawt zawk nan  tualchhungmi te, Sawrkar leh mipui thlawpna an mamawh tih a sawi bawk a ni.