No.4041/2021-2022

Aizawl, the 18th February 2022: Vawiin chawhma khan Governor Hari Babu Kambhampati chuan Raj Bhavan-ah Mizoram Post Post Office hotulian te a kawm a. Mizoram chhunga an hmalaknate zawtin thingtlangmite tan Bank ang chiah a hna thawhtheih dan te nasa zawk a zirtirna pe turin a chah.

Governor Hari Babu Kambhampati chuan Mizoramah Dak In hnathawk ten tha tak leh tangkai taka hna a an thawk chhunzawm chu lawmawm a tih thu a sawi a. Mizoram hmun tinah Dakin a awm deuh vek avang leh Digital Technology tha taka hmang department an nih angin mipui tan an pawimawh a sang em em a. Tunah chuan Postal Service chu lehkha, bungrua leh pawisa inthawnna chauh a ni tawh lova Bank lian tak an ni tel tawh a ni a ti. Tunah hian Mizoram hmun kilkhawr tam zawka cheng te tan Bank pan a la harsa hle a; a darh zau ber, Mizoram Rural Bank pawhin  a la tuamchhuak hneh lo hle a. Hetih lai hian Post Office chu hmun tinah deuh thaw a awm bakah, a awmlohna khua atanga pan awlsam tak a ni vek a. Post Office-ah te hian saving account te chengkhatmah dah ngai lovin a hawn vek theih zui a. Post Office a Bank Account hi Bank pangaia account nen a ti theih a inang deuh vek tawh bawk a. He thil hi Bank awmlohna hmuna cheng ten an hriat a ngai a; tangkai taka hman a nih theih nan Dak In a thawk ten mipui zirtirna kawngah tan an lak nasat a ngai a ni a ti.

Central Sawrkar atangin tanpuina Scheme tha tak tak a awm teuh a; hemi kaltlanga pawisa Beneficiary ten an dawn tur te chu DBT hmangin an account dah deuh vek a ni tawh a. Chuvangin, bank awm lohna hmuna cheng beneficiary te tan chuan in sengso teuh a Bank awmna pan aiin an awmna bul hnaia Post Office account hawn an intihhmuh a ngai a ni a ti. Post Office in a kalpui the  Sukanya Samriddhi Account (SSA) – hmeichhe naupangte puala bank account nu leh pa te hawnsak torah pawh Post Office a thawk te tan an lak nasat a ngai tih a sawi a. Post Office a account nei lo tan pawh thingtlang khua Bank ATM awmlohnaah Aadhaar Enabled Payment Systems (AEPS) - Aadhaar ATM  tangkai takin an hmang thei a.Bank Account nei te tan  Aadhar Card hmangin heng thingtlang khua ATM awmlohnaah te hian Post Office-ah pawisa Rs 15000/- thleng an la chhuak thei tih te pawh hi hre lo tam tak an la awm a. He mi chungchanga leh Post Office in a kalpui sum peipuna scheme tha tak tak te hi mipuiin kan hriat a ngai a ni a ti.

He hunah hian Pu  T. Mangminthang, Postmaster General, NE-I  chuan   “Presence and activities of -Department of Posts in Mizoram” tih thupui hmangin Post Office in Mizoram chhunga hna a thawh tlangpui a sawi fiah a. Pu Lalnuntluanga, BM, IPPB, Aizawl in  “India Post Payments Bank Ltd (IPPB)” tih thupui hmangin Post Office in Bank an kalpui dan a sawi thung a ni. Report a tarlan dan chuan tunah hian Head Post Office, Aizawl hnuaiah Mukhya Dak Ghar pakhat, Sub Post Office 38 leh Brach Post Office 347 a awm a. Thawktu officer leh staff pangai 175 bakah Dakpu - Gramin Dak Sevak 990 an awm mek a. Mizoram chhunga post office zawng zawng te chu Core Banking hmanga thlunzawm vek a ni tawh a.Thingtlanga post office-ah te pawh Digital Advancement of Rural Post Offices for a New India (DARPAN) hman a ni tawh a ni. Post Office chhunga bank - India Post Payments Bank Ltd (IPPB) hnuaiah hian Bank hnathawh ang Savings Bank, Recurring Deposit, Monthly       Income Scheme, Time Deposit, Public Provident Fund,     Senior Citizen     Savings Scheme, NSCs leh KVPs te kalpui a ni mek a. Tunah hian Mizoram chhunga Post Office hrang hrangah Account hawn theih vek ni tawhin account 2,13,219 enkawl mek a ni. Pawisa pek chhuahna RTGS, NEFT, IMPS, UPI, Aadhaar Enabled Payment Systems (AEPS) - Aadhaar ATM, etc  kaltlangin a kalpui mek a. Heng bakah hian insurance policy hrang hrang a kalpui mek bawk a. NREGS, PM Kisan Yojana, PM Awas Yojana, PM Ujjwala Yojana leh Students Scholarships ah te pawh DBT a kalpui mek a ni.