3550/2023-2024

Aizawl, the 29th January, 2024: Coal India Limited, Kolkata, Deen Dayal Sravana Foundation (DDSF), Andra Pradesh leh National Programme for Prevention and Control of Deafness (NPPCD), NHM Mizoram te tangkawp buatsaihin vawiin chawhnu dar 3:00 khan Raj Bhavan Durbar Hall-ah ri hriatna tha lo, bengdar vuah ngaite hnenah a thlawna bengdar (hearing aid) sem a ni. He hun hi Governor Dr. Hari Babu Kambhampati chuan khuallian niin a hmanpui a, Home Minister Pu K. Sapdanga chu khualzahawm a ni.

Khuallian Governor Dr. Hari Babu Kambhampati chuan World Day of the Deaf pualin September ni 25, 2023 a thlawna bengdar sem chhuah tum khatna hlawhtling taka neih a nih hnuah a thawh hnihna hmanga mi 339 te hnena a thlawna bengdar sem chhuah a ni leh tur chu lawmawm tiin duhsakna a hlan a. Thawh hnihna hnuaia a hmasa ber atan Aizawl District atanga mi 207 te hnena vawiina bengdar sem chhuah a ni ta chu lawmawm a tih thu a sawi a. Governor chuan Ministry of Social Justice and Empowerment hnuaiah Disabled persons for purchasing / fitting of aids / appliances (ADIP) kaltlangin painphunga rualbanlote tan tanpuina a dawn theih thu a sawi a. Sawrkar laipui kaltlanga hamthatna hmuh tur tam tak a awm thu tarlangin, Mizoram State-in Central Sawrkar kaltlanga hamthatna awmte a dawn zel theih nana tanlak tlan a pawimawh thu a sawi a. Bengdar sem a nih theih nana Coal India Ltd. leh Deen Dayal Sravana Foundation-te hmalakna bakah a dawng tur thlan chhuah kawnga hmalatu NPPCD, NHM hnuaia thawktute hmalakna fakawm a ti a. Thlan chhuah zawng zawngte'n bengdar an dawng vek thei tur chu ropui a tih thu sawiin, hmalakna hlawhtling tak a ni, a ti bawk.

Khualzahawm Home Minister Pu K. Sapdanga chuan company, official leh ram hruaitu mi harsate tanpui tura pen chhuak leh inpete fakawm tiin, ri hriatna kawnga harsatna neite tana theihtawp an chhuahna hi a chhuanawm takzet a ni, a ti a. Ri hriat lama harsatna chuan rual pawl leh nunphung thenga a tih khaihlak phah thu sawiin, Mizoram sawrkar chuan rualban lohna hrang hrangte a ngaihsak zel dawn thu leh an tana hmalakna reng reng a thlawp zel dawn thu a sawi bawk.

He hun hi Pi Esther Lalruatkimi, Principal Secretary, H&FW Department chuan kaihruaiin kalkhawmte lawmna thu a sawi a. NPPCD hmalaknate a tarlang bawk. Bengdar leina senso tumtu Coal India Limited atangin Pu Manash Pratim Dutta, General Manager, North Eastern Coalfield, Assam leh a buaipuitu Deen Dayal Sravana Foundation aiawhin Dr. Thota Venkata Sarvarayadu, Independent Director, National Fertilizers Ltd. te'n thu an sawi bawk a. Dr. Eric Zomawia, Mission Director, NHM in lawmthu sawiin hun hman a khar a ni.

NPPCD kaltlanga bengngawng awm lohna India siam tura hmalakna kaltlanga bengdar sem chhuahte hi Coal India Ltd. te'n CSR hmanga an rawn tum a ni a. Coal India Ltd-te hian NGO Partner atan Deen Dayal Sravana Foundation (DDSF) an hmang a. Anni nena thawk hovin National Programme for Prevention and Control of Deafness (NPPCD) thawktute chuan Mizoram chhunga bengngawng, bengdar vuah ngai zawn chhuah hna nasa takin an kalpui a, he hmalakhona kaltlang hian bengdar mamawhtute hnenah sem chhuah a ni.

Coal India Ltd. leh Deen Dayal Sravana Foundation-te hmalakna hnuaia a thlawna bengdar sem tum hnihna kaltlang hian Mizoram District pathum Aizawl, Lunglei leh Champhai ahte bengdar sem chhuah a ni dawn a. A hmasa ber turin vawiin hian Aizawl District-ah bengdar 207 sem chhuah niin, Raj Bhavan Durbar Hall-ah 30 sem niin, a dang 177 te DHME Hall-ah sem a ni a. Ruahman dan chuan naktuk January ni 30, 2024 hian Lungleiah bengdar 65 sem tum niin, February ni 1, 2024 hian bengdar 67 Champhaiah sem a ni dawn bawk a. Avaiin bengdar 339 sem chhuah a ni dawn a; hengte hi Rs. 20,000/- atanga Rs 60,000/- inkarte niin, senso zat hi Rs. 80,00,000/- (cheng nuai sawmriat) vel bawr a ni.