Vawiin khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chuan Sainik School Chhingchhip-ah Annual Day hmasa ber a hmanpui.
Governor Lt. Gen. Nirbhay Sharma chuan Sainik School Chhingchhip dinna tura ram petu chhungkaw 60-te hnenah lawmthu sawiin, Mizo khawtlang nun thatzia a tilang a ti a. India rama school tha zinga, Sainik School Chhinchhip, a 26-na a ni chu lawmawm a tih thu a sawi. Principal leh a staff te hnathawh chu fakin, zirlai naupangte nen bultantu an nih angin hun pawimawh tak an tawng mek a ti a, midangte entawn tura nun dan tha leh hriselna vawng tlat turin a chah a ni. Mizo sipai officer-te chu khawtlang tana mi tangkai an nih thin thu a sawi a. Tunhnaiah Mizo zingah sipai officer an tlem tial tial in, SSC chuan Mizo sipai officer tam zawk a neih tir theih a beisei thu a sawi. Sawrkar laipuiiin hmeichhe naupangte Sainik School-ah luh a phal dawn thu a sawi a, hmeichhe naupang luhtir hmasa bertu an nih theih a beisei thu a sawi a ni. Governor chuan Annual Day lawmnaa kalkhawmte chu ruihhlo leh zuk leh hmuam do turin thawhpuiah a sawm a. Kan rilru leh khaw hawi tihzau a ngai tiin, Hindi chuan sakhua leh culture a nei lo a ni, ati. Governor hian zirlai naupangte hnenah infiamna hmanrua pein, sikula thawklai mi 6-te hnenah Proficiency Certificate a hlan nghal a ni
Principal Lt. Col. Inderjit Singh chuan an school chanchin tlangpui a tarlang a. Zirlai naupang 60 an neih mekte chu Officer 2 leh staff 21-ten an enkawl thu a tarlang a. School aiawha inelna hrang hranga an feh chhuah thin thu leh India ram hmun thenkhatte an fankual pui thu a sawi. SSC chuan hmeichhe naupang luhtir tura phalna a hmuh tep tawh thu sawiin, Governor Lt. Gen. Nirbhay Sharma chungah lawmthu a sawi a, phalna an hmuh veleh mipui hriattir thuai an nih tur thu a sawi bawk.
He hun hi Administrative Officer Maj. V.K. Sangwan-in lawmthu sawina in a khar a ni. Annual Day hmannaah ah hian zirlai naupangte’n cultural programme-ah an thiam thil te an entir a. Venghlun Branch YMA Chhang, Chhingchhip te’n lam an entir bawk a ni.
