Mizoram Governor, Lt. Gen. Nirbhay Sharma, PVSM, UYSM, AVSM, VSM (Retd), chuan vawiin chawhma khan Assam Rifles-ten an din champhaphak vawi 182-na lawmna peng pakhat atana an buatsaih ‘Cycle Expedition Rally’ chu Khatla-a 23 Sector Assam Rifles Headquarters atangin a vailiam.

Cycle Expedition Rally vailiam puala inkhawm tawiah Mizoram Governor Lt. Gen. Nirbhay Sharma chuan Rally-a tel tur zawng zawngte duhsakna hlannin, India hmarchhak chu hnam hrang hrangte chenna, thing leh mau leh nungcha hrang hrangte leh tlangram mawi tak tak hmuh tur awmna a ni, a ti a. He Rally pawh hian India hmarchhaka chengte zingah ‘Muanna, Inunauna leh Thianghlimna’ thu uar takin thehdarh ngei se a thu a sawi bawk.

Assam Rifles buatsaih Cycle Expedition Rally-ah hian 39 Assam Riffles-atangin sipai pakua telin Captain, Tushar Mehlawat-a’n a ho ang a. Sipaite hian Mizoram tlangdung hrang hrang leh Assam phai zawlte an paltlang hnuah Meghalaya tlang lawn lehin March ni 20, 2016-ah Shillong khawpui an lut dawn a ni. He Rally-a telte hian chawlhkar khat chhungin KM 743 vela thui kawng an zawh hman dawn a ni.

Head Quarters Director General Assam Rifles hian Assam Rifles din champhaphak lawmna atan hian state dang dangah pawh Cycle Expedition Rally hi buatsaih a tum mek bawk.