Governor Lt.Gen(Rtd) M.M.Lakhera, PVSM,AVSM,VSM chuan vawiin khan Mizoram Bharat Scouts & Guides in Rajya Puraskar Award semna inkhawm Aizawl Central Hall-a neih chu a hmanpui. Inkhawm hi Pu Zoliana Royte, State Chief Commissioner Bharat Scouts & Guides in a kaihruai.

Governor chuan thalaite chu hetiang award la thei khawpa tan an la chu lawmawm atih thusawiin khawvel thil hrang hrang a lo thleng mek a, heng ah te hian inveng thiam a, a tha  leh tha lo lai thliar thiam a, a tha lai chauh zawm turin a chah.Kan thil tum hi tumruhna leh taimakna nena kan tan chuan kan hlawhtling ngei dawn a ni Governor chuan tiin Scouts & Guides thupui pakhat angin ram leilungmi tha tak ni turin a chah a bawk.

Governor hian school 20 atanga Scouts & Guides 98 hnenah Rajya Puraskar Award hi a hlan. Scout & Guide hi June 6,1932 khan Rev. F.J. Raper kaihhruaina hnuaiah Lunglei ah din a ni a. Mizoram ah hian Rajya Puraskar Awardees (State Award) 904 leh Rashtrapati Awardees ( National Award) 402 an awm a, tunah hian Scout 3337 leh Guides 3237 an awm a ni.