Nimin tlai ah khan Governor Lt.General Nirbhay Sharma PVSM, UYSM, AVSM, VSM (Retd) chuan Raj Bhavan ah Pu Sandipan Chakravorty, Chairman, Confederation of Indian Industry(CII), North East Council leh CII Official te a kawm a.

Governor chuan CII hotuten Mizoram an rawn tlawh chhan te zawt in Mizoram chhunga Industry tihchangtlun dan tur te a sawipui a. An inkawmna ah hian Governor chuan Mizoram ah thalai hawihhawm tak tak leh themthiam tak tak an awm thu a sawi a. Sawrkar hna ah an lut vek thei dawn lo tih a chiang a, hengho hi skill training pek an nih phawt chuan eng hna pawh thawk thei tura theihna nei an ni a ti a. Mizoram ah CII hmalakna in Business Process Outsourcing(BPO)/Call Centre theih ni se a hlawhtling ngeia a rin thu CII, NEC hotupa hi a lo hrilh a ni.

CII aiawh a Mizoram sawrkar hotute rawn kawmtu Pu Sandipan Chakravorty chuan Mizoram ah Industrialists sawm lut tur chuan inkalpawhna kawngpui zau tha zawk, ni khat chhunga Lengpui Airport a tlawhtheihna tum zat tih tam, hotels changkang zawk siam belh, zan lam a hnathawh hun pawhsei, dawr hawn hun tih rei, cinema hall leh multiplexes hawn te a pawimawh hle dawn a hriat thu a sawi a. Mizoram state chu CII in target state atan a thlan a nih thu sawiin Sawrkar in Rail Road siam mek pawh rang zawka siam zo tura Contractor te a vil pawh a pawimawh dawn hle a ni a ti.

An inkawm zel na ah Governor chuan Mizoram chhunga luidung te Inland Water ways atan siam theih a ni dawn em tih zirchianna neih pawh state sawrkar in a ngaih ven tan tawh a ni a ti a,. Mizoram chuan hmasawnna ruhrel din nan leh sumdawnna atana pawimawh ber pakhat remna leh muanna a neih avangin duhsak bik a phu a ni a ti. State chhung sik leh sa a nawm vang leh boruak a thianghlim avangin Medical Tourism ah sumdawnna kalpui a remchan tur thu CII hotute hi a lo kawh hmuh bawk a ni.