Vawiin khan ASSOCHAM, Ministry of Food Processing Industries (MoFPI), NABARD leh Mizoram University te chuan ‘Conference on Startups and MSMEs in Food Processing’ chu Hotel Regency-ah an buatsaih a. Mizoram Governor Pu Kummanam Rajasekharan chu Khuallian niin a hmanpui a ni.

Pu Kummanam Rajasekharan chuan kan khawsak phung danglam avangte, chak lak tur remchang leh sawrkar policy avangtein Startups and MSME te tan food processing sector-ah hmasawnna tur a tam phah hle a ni, a ti a. Food processing industry chu India economy tana thawhhlawk berte zing ami niin, mi tam tak tan eizawnna a siam a, agriculture leh industry te thlunzawmtu pawimawh tak a ni, a ti. Mizoram chu thei leh thlai chi hrang hrangah a hausa in, food processing lamah a hmalam hun a eng a ni, a ti. Governor chuan Kerala-a agriculture kaihhnawih Board hrang hrang hotute chu a lo biak tawh thu leh an ni pawhin Mizoram food processing sector tichangtlung tura puih an inhuam thu a sawi a. Food processing industry chu Mizoram tana sum lakluhna tha tak a nih tur thu leh ei bar intodelh kawnga hmalakna tha tak a nih thu a sawi a ni. ASSOCHAM hmalakna chu fakin, food processing-ah hmasawn turin eng harsatnate nge kan neih a, a huhoa hmalak dan tur kan ruahman thei dawn a ni, a ti.

Khualzahawm Prof. KRS Sambasiva Rao, Mizoram University Vice Chancellor chuan Mizo thalai leh heti lama tui mite tana exposure pawimawhnate a sawi a, technology leh scheme awmte an hriat phah dawn a ni, a ti a. Mahni kutkawiha eizawngte food processing industry kalphung a hriattirin, a chawk phur dawn a ni, a ti. Technological and Innovation Park din tura State sawrkar hnena ruahmanna a lo thehluh tawh thu a sawi a. Hei hian ram hrang hrang atanga industry-te Mizoramah a hip in, mi tam tak tan eizawnna a siamsak thei dawn a ni, a ti. Mizoram University chu heti lama kaihhruaitu leh training pe tura a inhuam thu a sawi a ni. Mizoram chuan thei, thlai, hmuihmer bawlhlo leh pangpar te bakah thil in chi (beverage) hrang hrangah theihna sang tak a neih thu a sawi bawk  a ni. 

Pu Chetan Vij, ASSOCHAM Assistant Director chuan inlawmna thu sawiin, Pu RK Srivastava, General Manager, NABARD Mizoram chuan mahni kutkawiha eizawngte tana sum tanpuina leh assistance awmte a sawi a. Dr. KP Chaudhary (Senior Scientist and Head), KVK, College of Veterinary Sciences and Animal Husbandry, Central Agricultural University, Selesih pawhin vawiina conference thupui (thematic address) hmang hian thu a sawi a ni.