Vawiin tlaiah khan Raj Bhavan Conference Hall ah Mizoram Governor Lt Gen Nirbhay Sharma (Retd.) chuan khuarel chhiatna lo thleng thei chi hrang hrang te rilru inpuahchah lawkna nena mipui ten an hmachhawn theih dan tur kawng awm thei te Disaster Management & Rehabilitation Department(DM&R) hotute leh 1st Bn National Disaster Response Force(NDRF), Guwahati atanga lo kal te a sawipui.

DM&R leh NDRF hotute a kawmna ah Governor Lt Gen Nirbhay Sharma (Retd.) chuan chhiatrupna thleng thei thil chi hrang hrang te rilru fim taka hmachhawn a nih theih nan Mizoram mipui te chu ngunthluk zawk leh vawi tam zawk zirtirna peka, inchhanchhuah dan te , lo inrinlawk dan bakah hliamtuar te bawihsawm dan chi hrang hrang te pawh a rang lam a zirtir an ngai a ti a. Tunhnai ah lirnghing a thlen ngun telh telh thu te, lirnghing hnuhnung apiang a hmasa aia a nat zawk thu bakah seismic zone –V ah Mizoram a awm avanga lirnghing na zawk a thlen theih thu te Mizoram mipui in an hriat a pawimawh hle a ni a ti a. DM&R, District Disaster Management Authority leh NRDF kaihruaina te zawm theuh a tul a ti. Governor chuan mipui zirtirna kawngah te tawngka a sawifiah tum mai a tawk loh thu sawiin lemchan nena zirtirna kalpui nasat a tul tih DM&R, District Disaster Management Authority leh NRDF hotute chu a hrilh a ni.

Governor nen inkawmna an neih zawh ah DM&R leh NDRF official te hian Circular Lawn, Raj Bhavan ah Raj Bhavan a hnathawk zawng zawng te leh an chhungkaw member te hnenah Lirnghing laka him theihna kawng hrang hrang te zirtirna an pe a. He hunah hian Lirnghing lo thlen hunah insaseng dan bakah damdawi in pan pui hma a lirnghing vanga hliam tuarte enkawl dan zirtina te pawh pek a ni.