No.330/2021-2022

Aizawl, the 30th April 2021: Vawiin chawhma kha Governor PS Sreedharan Pillai chuan Health Minister Dr R.Lalthangliana, MKHC hruaitute, Joint NGO hruaitute leh Ex-Services League aiawh te Durbar Hall, Raj Bhavan-ah Covid-19 hrileng thawhnihna dona kawnga Mizoram sawrkar hmalakna hrang hrang leh inpuahchahna te a sawi pui.

Governor Pillai chuan tuna Covid-19 second wave laka kan himna tura state sawrkar hmalakna ti chak tura pawl tangkai leh pawimawh tak tak ten dawhkan kilhoa sawihona neih a tul tawh em avanga Meeting chu koh a ni a ti a. Kan ram pumpui dinhmun a that loh avangin Vice President leh Prime Minister te chuan Governor te chu state sawrkar hmalakna te a chak zawk theih nan Raj Bhavan te hmang tangkaia a tul anga state mamawh awm thei te hrechianga central thlen thin tur te, mipui zirtirna kawngah kohhran leh khawtlang hruaitute nasa zawka thawhpui tura thurawn an pek tel thu a sawi bawk a ni.

Covid -19 First wave-ah Mizoram chu Kohhran mite leh Tlawmngai pawlte thlawpna bakah mipui thuawihna zarah state him ber pawl kan ni a. Chief Minister kaihhruaina hnuaiah Health Minister leh a thawhpui ten hna ropui tak an thawka tun dinhmun hi kan thleng a ni a ti. Tunah hian Covid -19 second wave rawn intan leh mekin hrivei pawh a ni telin an pung a. Tun hun hi fimkhur inzirtir uarna hun a ni a; tuna hmalak thatin rah tha a chhuah dawn a, Mizoram mipuite him leh him loah mimal tin ten mawhphurhna kan nei a ni a ti. Hrileng laka himna inzirtirna kawngah Kohhran hruaitute, Tlawmngai pawl te, Zirlai hruaitute leh Ex-Service League hruaitute chu nasa zawk a tan la zual sauh tur leh sawrkar thlawp tlat a in hawng chhunzawm turin a ngen bawk a ni.

Sawrkarin pawnchhuah khapna thupek a siam te bakah hrileng laka himna tura inkaihruaina pawimawh chi 3 mithiam ten an sawi - hmaikawr vuah, midangte hlata awm leh kutsilfai uar te chu tun aia tha zawka zawm a tul thu a sawi a. Mi pakhat hrivei in a fimkhur loh chuan ni 30 chhungin mi 406 a kai chhawng thei a. Hei hian mahni inringhlel leh hrivei te inkhunghran pawimawh zia a ti chiang em em a. Tunah hian mithiam tam takin Covid-19 hrileng chu boruak atanga inkaichhawn theih angin an sawi mek a. Hei vang hian mitin ten kan him zawkna turin Hmaikawr(Mask) vuah hrim hrim hi kan tihtur a ni a ti.

Hrileng do kawngah tihtur leh tihlohtur te nasa zawka inzirtir chhunzawm a tul tih a sawi a. Mithiamte zirchianna atangin India ram mipui 50% chiahin Hmaikawr an vuah a; a vuah zinga 14% chiahin an vuah hram a. Hengte avang te, mipuiin sawrkar thu an zawm loh avang te leh fimkhurna tura thil pahnih dang thlahthlam vang te hian India ram state dangah chuan hrileng a punlun a; mi tam takin nunna hlu tak an chan tawh a. “Mizoram mipuite chuan hrileng laka kan him theihna te mit leh hnar tluka kan chian a ; chhungkawtin te kan him vek ka duh a ni”, a ti .

Governor hoa meeting pawimawhah hian Health Minister Dr R.Lalthangliana chuan Covid – 19 dona kawngah Mizoram sawrkar chuan chawl loin thla 16 chuang zet hma a la tawh a; nasa zawkin tan a la sauh sauh mek a ni a ti. Covid - 19 hrileng dona kawngah Kohhran mipui leh an hruaitute, YMA leh tlawmngai pawl hrang hrang te leh tualchhung leh khawchhunga Local Council leh Village council te chungah sawrkar a lawm takzet tih a sawi a; sawrkar thlawp chhunzawma, thawhpui chhunzawm zel turin a ngen a ni. Covid -19 First wave-ah khan Mizoram sawrkar chu state dang te aiin a inpuahchah tha zawk tih a sawi a. “India ram state dang te tih hmain Mizoram chuan Lockdown a puang a, state ramri te khar vekin a veng nghal a, Airport-ah pawh screening kalpui vat nghalin State, District leh Village/Local Council Level Task Force chak tak din nghal a ni a. Heng kan hmalaknaah te hian midangte aiin kan ti hmasa deuh vek a. Sawrkar a hun taka a chet zung zung a vang te, kohhran, mipui leh tlawmngai pawlte thlawpna tha tak avang te, police te thawhrimna leh mimal tinte thuawihna avangin state him ber kan ni mek a. Tun thlengin Pathian zarah Covid-19 hrivei zingah nunna pawh kan thenawm state dang, keini aia mihring tlem zawk te ai pawhin kan tlem hial a ni”, a ti. Tun dinhmunah Mizoram chhunga Covid -19 hrivei nunna chante chu mi 14 an nih thu a sawi a. Hei hi Zoram mipuiin pawi kan tiin kan tuarpui takzeta. Hetih lai hian kan state mipui aia mihring tlem zawk chenna Sikkim state-ah pawh he hrileng vang hian mi 140 chuangin nunna an chan tawh a. Heta tang hian inthlahdah a thianglo tih kan chian a ngai a. A tul chuan sawrkarin khirh zawka inkhuahkhirhna leh pawnchhuah khapna te pawh a siam a la ngai dawn a ni a ti.

Pu R.Lalramnghaka, Special Secretary, Health & Family Welfare report pek dan chuan tunah hian mimal sumdawng Oxygen siamchhuahna khawl nei mi 4 bakah Aizawl Cilvil Hospital, ZMC leh District Hospital thenkhatah te Oxygen siamchhuahna a awm mek a. Heng atanga ni khat chhunga Oxygen siam chhuah theih zat chu 4800 Cubic Metre niin Mizoram mamawh chu a la phuhruk thei a ngaih a ni a. Oxygen siamna khawl neih belh tura hmalak mek a ni. Ventilator pawh ngaihtuah belh mek a ni a. Hrivei nazual te enkawlna Remdesvir pawh 1000 vials chah mek a ni a. Kum 18 chin vaccine lak theih hun atana hman tur Vaccine pawh mamawh zat thlen a ni tawh a. Nimin chawhnu lam thlenga Vaccine pek chhuah tawh zawng zawng zat chu dose nuai hnih leh singli a chuang tawh a ni.

Governor hoa Covid-19 hrileng dona kawnga sawihona hi Pu V.Lalsangliana, Secretary to Governor chuan a kaihruai a. He hunah hian MKHC aiawhin Rev.Lianhmingthanga Sailo, Vice President leh Joint NGO Coordination Committee aiawhin Pu Vanlalruata, President, CYMA leh Ex-Services League aiawh in Surg.Lt.Cdr. Lalnuntluanga, Director, Sainik Welfare & Resettlement ten thu an sawi bawk a ni.