1527/2023-2024

Aizawl, 16th August 2023: Governor Dr Hari Babu Kambhampati chuan vawiin khan ama hmalakna anga Raj Bhavan in a buatsaih lehkhabu, Mizoram mi leh sa, India Sipai huaisen 56 te chanchin tawi tarlanna, “Bravehearts of Mizoram” chu a tlangzarh. Tlangzarhna program, Banquet Hall, Raj Bhavan a neihah hian Martar te chhung leh khat, mi 20 chuang an rawn tel thei a ni.

Lehkhabu tlangzarhna hunah hian Governor chuan Martar chhungte hnenah  lawmthu a sawi hmasa. An hmangaih kal ta te chu kan tana pasaltha, mihuaisen leh Martar te an ni a ti. Lehkhabu te hi Martar chhungte hnenah Governor chuan a hlan hmasa a. Lehkhabu anga Martarte hming leh nihna tawi siam hi kan Martarte chawimawina leh hriatrengna atana kan bat leh tih makmawh a ni tih a sawi bawk.

He hunah hian, Martar chhungte lam atangin thusawi ngaihthlak a ni a. Governor hnenah hian an harsatna te pawh an thlen nghal bawk a ni.

Mizoram atanga India Sipai a tang zinga Martar 56 te hming hi National War Memorial, New Delhi-ah tarlan a ni a. Mipakhat hming leh nihna te hi War Memorial  bang cheina  Brick(leirawhchan)  pakhatah zel ziah a ni.

Lehkhabu thuhmahruaiah Governor Dr Hari Babu Kambhampati chuan hetiang hian a ziak.  “Ni 20th February 2023 khan New Delhi-a National War Memorial ka tlawh a. Mak tak maiin, hemi ni tak,  20th February hi Mizoram Statehood Day a ni lo ni leh zel a ni.

Kan ram tana an nunna hlu tak hlantu, martar te thlan han tlawh a, anmahni zahna chawimawina chibai buk chu ka tan chuan thil ropui tak a nih rualin an thil tih ropui tak leh ram tana ka thil tih chhun te chu khaikhin chi rualah ka dah lo a. An inpekna hlu tak avang hian zalenna , remna leh hmasawnna kan nei chho mek a ni. Kan ram chuan kan pasaltha huaisen te hi zahna  chibai a buk a, midang tana an nunna hlu tak hlantute chungah hian  kan lawm kumkhua tawh  ang.

He lehkhabu hi Mizoram atanga India sipai tang te zingah Martar a chhiar,  National War Memorial-a an hming tarlan te  Bio data lakkhawm a ni. Lehkhabu buatsaihna kawngah, Sipai hotute leh official te,  details leh data min lakkhawm puitu te hnenah lawmthu ka sawi a. Tin, Department of Sainik Welfare & Resettlement, Government of Mizoram chungah lawmthu ka sawi bawk  e.

He lehkhabu hi kan ‘naktuk’ atana an ‘vawiin’ petu mihuaisen te zahna lantirna atan buatsaih a ni. An inpekna hlutak te kha kan thinlungah a cham reng tawh ang!

Jai Jawan chu! Jai Hind!”