Vawiin khan Multipurpose Hall, Mizoram University(MZU), Tanhrilah MZU kum 18 a din hnua Convocation vawi 13-na chu hman  a ni a. MZU Convocation hi Mizoram Governor Kummanam Rajasekharan, Rector of Mizoram University ni bawk chuan khuallian niin a hmanpui a. Dr G. Satheesh Reddy, Chairman, DRDO pawh he hunah hian zirlaite fuihna thu sawi tura sawm niin  tel bawk a ni. 

Mizoram Governor Kummanam Rajasekharan chuan mithiam degree nei thar te chu beiseina sang tak nen khua leh tui tha, mi rawntlak( Educated Citizen) ni turin khawtlang rawngbawlnaah a lawmlut tih a sawi a. Degree tha tak neih chu thil lawmawm tak ni mahse hlawhtlinna vawrtawp a ni lova, a bul tanna chauh a ni a ti.  University in a pawmpui gegree hlutak  tak te chu thiamna hman tangkai kawngah a kawltute nawr kaltu ni se a lawmawm hle ang a ti a.  Mithiamte hlawhtlinna leh hlawhchham  dan pawh   khawtlang hmasawnna atan a thawh hlawk em tih te leh  khawtlangin harsatna a tawh mek te sutkian dan kawng a hmuchhuak em tih ten a hrilhfiah thin a ni a ti.   "Mizoram tih hmasawn nan kawng tam tak awm mahse heng  -agriculture, horticulture, food processing, handloom leh  handicrafts ah te hian kan hlawhtlin theihna a sang zawk a. Vawiina kan thalai lehkhathiamte hian phur puiin luhchilh se nasa takin hma kan sawn ka ring a ni. Khawi society-ah pawh hmalakna hrang hrangte awm mahse an thalaiten an phur pui loh chuan awmzia a nei thin lova. Thalaite khawvel a nih angin thlalaite phurpui a piang a hlawhtling thin a ni", a ti a. Thalai lehkhathiam rualte chu Mizoramin a hlawhtlin awlsam pui tura hriatchiante rawn tinzawnin  Entrepreneur huang chhungah tumruhna leh phurna nen rawn penchhuak turin a sawm a ni. 

Dr.G. Satheesh Reddy, Secretary, Department of Defence, Research & Development(R &D) & Chairman, Defence Research & Development Organisation (DRDO) Ministry of Defence, Government of India chu Kumina MZU Covocation-ah hian Khualzahawm  leh special speaker atan sawm a ni a. Zirlaite fuihna thu sawiin an taihmahna te, an zirtirtute inpekna leh hun reilote chhunga MZU hmasawn zia a hmuh atang ringawt pawhin MZU chhuak mithiamte chu  'a ber' kai turin thiamna an nei a ni a ti a. India ramin science and technology-ah kawng tin rengin hma a sawn a. Nuclear leh Space technology-ah phei chuan khawvelah hmahruaitu ram panga paruk vel lek zingah a tel tawh a. India chuan tunhma atang tawhin technology thenkhat a mamawhte pawnlam atanga a hmuh theihlohte pawh beidawnpui lovin a siam thiam chhunzawm nghal zel thin a ni a ti. "India chuan science & technology-ah midangte siam tawhsa siam thiam chhunzawm zel kan duh tawk tawh lova, a hmuchhuaktu leh a hmahruaitu nih kan tum a. Chumi kawng atan chuan Prime Minister hmalakna hnuaiah pawh " Make in India" kan kal pui mek a ni", a ti. Dr.G. Satheesh Reddy chuan University tam takah Incubation Centre leh Centre of Excellency an din tawh tih a sawi a. Science & Technology huang chhung, a bikin Defence Research & Technology-ah phei chuan MZU zirlaite an tuia puih tlaka an rawn penchhuak a nih phawt chuan anmahni pui tur leh a tul phawt chuan Centre of excellency pawh rawn din turin DRDO chu a inhawng a ni a ti. President hlui leh Scientist ropuiin a lo sawi thin, “Dream, Dream, Dream. Dreams transform into thoughts And thoughts result in action.” tih chu zirlaite tan nupui a ngai a ni a ti. 

Mizoram University hi kum 2000 kuma din niin tunah hian kum 18 a hmang meka; National Assessment and Accreditation Council (NAAC) chuan  2014 leh  2019 inkar atan  Grade  'A' a pe a. National Institution Ranking Framework (NIRF) pawhin MZU chu kum 2018 chhunga University 700 thlanchhuah zinga athaber 81-naah a dah mek a ni. MZU Convocation vawi 13-naah hian Mizoram University Vice Chancellor Prof. K.R.S. Sambasiva Rao chuan zirlai hlawtling mi 3922 hnenah Degree a pe thar a. Heng zinga mi 948 te chu  Convocation-ah hian an Degree dawng turin an rawn tel thei a ni.   Degree dawng tura Convocation-a rawn tel mi 948 zingah hian  Doctor of Philosophy dawngtu mi 44, Master of Philosophy dawngtu mi 48, Master's degree dawngtu mi 463, Master's Degree in Professional lines( MBA, MJMC, MCA, MEd, M.Pharm) dawngtu mi 53, Bachelor's Degree dawngtu mi 214 leh Bachelor's Degree in professional lines( B.Tech, BBA, B.Pharm, BSc Nursing, B.Sc(MLT), LLB, B.Ed, BCA, B.Optom, N.Sc RIT) dawngtu mi 126 an awm a. Zirlai thiam ber ber thlanchhuah, Gold Medal dawngtu mi 49 leh Subject hrang hranga titha zual Book Prize winners mi 23 te hnenah chawimawina hlan a ni bawk a ni.  Mizoram Governor Kummanam Rajasekharan, Mizoram University Vice Chancellor Prof. K.R.S. Sambasiva Rao, Dr G. Satheesh Reddy, Chairman, DRDO leh MZU Pro Vice Chancellor, Prof R.P. Vadhera ten Degree leh award te hi an sem a. Vice Chancellor phalna lain MZu Registrar Pu Zothankhuma chuan MZU Convocation vawi 13-na chu a khar a ni.