Mizoram Women’s Hockey Association (MWHA) chuan kumin an Silver Jubilee (1984-2009) puala Tournament an buatsaih chu vawiin chawhma dar 11:00 khan Mizoram Governor Lt Gen M M Lakhera chu Khuallian niin he Tournament hi AR Ground-ah a hawng.

Silver Jubilee Tournament Organising Commitee Chairman Pi Zothankimi kaihhruai hawnna inkhawmah Governor chuan thusawiin MWHA chu Silver Jubilee chibai a buk a, he Tournament-a inel tura Mizoram district hrang hrang atanga infiammi lo kal te chu a duhsakna a hlan bawk. Tunhmain Mizoram chu Hockey-ah hmingchher tak anih thin thu sawilangin Governor chuan thangthar zinga infiammite chu hriselna, taihmakna leh tumruhna lamah tan la leh zual turin a fuih. Khuallian chuan Tournament Flag pawtpharin Mizoram atanga Hockey-a hranghlui leh mi hmingtha te hnenah Citation a hlan bawk.

Vawiina tan tak he MHWA Silver Jubilee Celebration Tournament-ah hian hockey team 24 - Lunglei-1, Serchhip-5, Saitual-2, Kolasib-2, Mamit-1 leh Aizawl atangin team 12 te an tel a. Hei hi MWHA-in tournament a buatsaih tawh zawng zawnga team tel thahnem ber tum a ni a, Tournament-a tel zawng zawng te chu Silver Jubilee T-Shirt pek vek an ni. He Tournament-ah hian Knock-out System hman a ni anga, team tla apiang chu Rs.1000/- in thlah an ni zel dawn. Champion lawmman bakah Top Scorer, Best Player leh Best Goalkeeper lawmman te siam a ni bawk a, Tournament kharna Final Match chu 14 February, 2009 (Inrinni) ah khelh a ni ang.