Cheng vaibelchhe 15.46 senga sak Mizoram University hmuna School of Physical Sciences Building thar chu vawiin tlai khan Mizoram Larsap Pu Vakkom B. Purushothaman, MZU Rector ni bawk chuan a hawng.

Larsap chuan Mizo thalaiten Science zirna lamah tuihalna nasa tak an neih nia a hriat thu leh chutih laiin Mizoram University-in Science peng hrang hrang Ph.D. thleng zir theihna tur a buatsaih chu a lawmawm hle a, he building sak that leh changtlung zawk chuan chung mamawh phuhruk nan innghahna tha tak a siam ngei a beisei thu a sawi. Kum 2001 July ni 2 atanga din MZU chuan kum 10 kalta chhunga thil chhinchhiah tlak tam tak a neih thu sawiin Governor chuan Science peng hrang hrang zirna kawnga a bikin Physical Sciences zirtirtu leh zirlaite chuan an thiamna leh tawnhriat te a taka khawtlang mipui tana hmang tangkai turin a fuih a. Pu Vakkom Purushothaman chuan Mizoram University hnuaia School of Physical Sciences chu duhsakna a hlan a, state chhung leh hmarchhak bial mai bakah rampum huap pawha zirlai hui lut thei khawpa tan la zui turin a chah a ni. Larsap chuan ziak leh chhiar thiam sanna chuan mithiam a hring belh zel a, hna erawhin a daih sen loh avangin lehkhathiam hna hmu lo an pun phah ve zel bawk a, chuvangin Mizo thalai lehkhathiam tak tak te chu khawvel khawi hmunah pawh hnathawk tura penchhuak ngam turin a fuih a. Mizoram ringawta hna beiseina rilru chu kan thlakthleng loh chuan harsatna nasa zawk kan la tawk zel dawn a ni, a ti.

Physical Sciences building thar hawnna kaihruaitu MZU Vice-Chancellor Prof.R. Lalthantluanga pawhin thu sawiin State Governor atana mithiam leh tawnhriat ngah tak Mizoram-in a nei chu lawmawm tiin MZU pawhin a kaihhruaina hnuaiah chak takin hma a sawn zel an beisei thu a tarlang a. A hmunhma ten a la zawh loh avanga zirlai 1200 vel chauh an la awm thu te sawiin post graduate department 26 leh under graduate department 2 awm mek te chu la tihpun belh zel tum a nih thu a sawi lang bawk. Kum kalta chhunga Ph.D. 42 leh M.Phil. 21 te hnenah degree hlan a nih thu te a puang bawk.

Physical Sciences building hawn thar hi Ministry of Heavy Industries hnuaia Engineering Project (India) Ltd enkawlna-in M/s ABCI Infrastructure Pvtl Ltd., Silchar te sak a ni a, March 2009 khan sa tanin January 2012 khan sak zawh a ni. A building pumpui zau zawng chu 4,852 sq.m a ni a, chhawng thuma sak niin Physics, Chemistry leh Mathematics department te awmna tur a ni. 200 KVA DG set te, kangmei venna hmanrua te, ruahtui khawlna tuizem te, rualbanlo te tana remchang lift te-a thuam vek nghal a ni.

Attachment

  • Loading attachment...