2986/2023-2024

Aizawl, 11th December 2023: Prime Minister Narendra Modi chuan Vawiin chawhma khan Video Conferencing kaltlangin ‘Viksit Bharat @2047: Voice of Youth’ a tlangzarh. Tunah hian India ram hi Developing Country a ni mek a, Viksit Bharat @2047 hmalakna atangin kum 2047 a lo thlen chuan India ram chu Developed Country nih kan tum a ni. Governor Dr Hari Babu Kambhampati chuan vawiina he program pawimawh tak hawnna hi Video Conferencing Room, Raj Bhavan atangin a lo chhim a. Virtual Launch Program zawh veleh MZU, ICFAI leh NIT a Vice Chancellor leh Registrar te hmalak dan tur a sawipui chhunzawm nghal a ni.

Governor Dr Hari Babu Kambhampati chuan sawihonaah hian Prime Minister-in kum 2047 tawp lama India ram Developed Country a hlankai a nih theihna atan hmalakna leh chonna a chhawp chhuah chu ropui a tih thu a sawi a. Developed Country kan nih theih na turin khua leh tui te chu Developed Citizen kan nih hmasak a pawimawh thu Prime Minister in a sawi pawh a tuihnih bawk. Governor chuan Developed Country ni turin kan ramah hnathawktu zinga tam ber leh thahrui ngah zawk - thalaite an pawimawh ber a ti. Thalaite chu Viksit Bharat @2047 hmalakna atana rawn penchhuak turin a sawm a. “Thalaite hi Developed Country kan nih theihna atana thawktu pawimawh ber leh a hlawkna teltu tur te an ni”, tih a sawi.

Meeting-a tel institute hotute nen Mizorama ‘Viksit Bharat @2047: Voice of Youth’ kalpui dan tur ruahmanna (strategies) a sawipui a. Vice Chancellors leh Registrar-te chu anmahni university hnuaia affiliated college leh educational institute zawng zawngte nen workshop nei tura chah nghalin, a remchang anga Review Meeting a la neih pui hlawm tur a sawi bawk.

He inrawnkhawmnah  hian Professor Dibakar Chandra Deka, Vice Chancellor, MZU, Prof Lal Nundanga, Registrar, MZU, Prof Bijay Singh, Vice Chancellor, ICFAI Mizoram, Dr David Lawmzuala, Registrar, ICFAI Mizoram leh Prof Ajmal Koya Pulikkal, Registrar, NIT te an tel a ni.