No.4831/2020-2021

Aizawl, the 7th September 2020: Vawiin nileng khan National Education Policy 2020 chungchangah President Ram Nath Kovind kaihruaina hnuaiah State leh UT a Governor leh Lt.Governor te, State Chief Minister thenkhat Education changtute, State H&TE Minister te chuan Video Conference kaltlangin ngaihdan sawihona an nei a. He hunah hian Governor P.S.Sreedharan Pillai pawhin NEP - 2020 chungchanga Mizoram ngaihdan leh duhdan te a sawi a. H&TE Minister Dr.R.Lalthangliana chuan Governor hi a tawiawm a ni.

Sawihona neih hma hian Prime Minister Narendra Modi chuan NEP - 2020 thiltum pawimawh zual te a sawi a. Union Education Minister Ramesh Pokriyal 'Nishank' pawhin thuhmahruai a sawi bawk a ni.

President of India hova NEP -2020 chungchanga inrawnkhawmnah hian Governor P.S.Sreedharan Pillai chuan National Education Policy -2020 chu Mizoram sawrkar chuan tha a tih thu a sawi a. Mizoramin a kalpui theih dan turin her rem ngai lai te pawh a awm a; heng te hi ngun takin H&TE Minister Dr.Lalthangliana kaihhruaina hnuaiah zir chian mek a ni a ti. Governor chuan Hindi tawng thiam pawimawhzia Mizoramah pawh inzirtir mek a ni tih a sawi a. Tun dinhmunah erawh chuan Mizo mipuite tawng hman thiam chu English leh Mizotawng a nih avangin NEP - 2020 hman hunah pawh a remchan dang anga tamin Mizotawng hman tum a ni a; a tul angin English nen hman pawlh a ngai dawn a ni a ti. Ram inpumkhatna kawng atan NEP - 2020 hman tangkai tha a tih thu a sawi tel bawk a. Hei hi tihhlawhtlin a nih theih nan NEP - 2020 ah Student Exchange programme te pawh telh theih ni se a tha ang a ti.

Ram pum huapa NEP – 2020 chungchanga hotulute leh mithiam filawr rualte inrawnkhawmna hi hun thumah then a ni a. Hawnna inkhawmah State hrang hrang aiawh ten an state ngaihdan an sawi a. Hemi hnuah hian Special Session neih a ni a; he hunah hian NEP – 2020 duangtu zinga a khaipa ber Dr. K.Kasturirangan, Chairman, Committee for draft NEP in thu a sawi a. Session hnuhnung ber : Technical Session chu Prof. D.P. Singh, Chairman, UGC in a kaihruai a. He hunah hian Prof. Manjul Bhargav, Member, Committee for Draft NEP, Professor of Mathematics, Princeton University leh Prof. N.K. Sridhar, Member, Committee for Draft NEP, Member, UGC ten thu an sawi a. Pu Ramesh Pokhriyal ‘Nishank’, Union Education Minister in khaikhawmna a nei leh a; Pu Sanjay Shamrao Dhotre, Union Minister of State for Education chuan lawmthu sawiin he programme pawimawh tak hi a khar zui a ni. President hova NEP-2020 sawihonaah hian Prof. K.R.S. Rao, VC, MZU, H&TE Commissioner & Secretary Pu Biaktluanga, Prof. J.K. Patnaik, Pro VC, MZU, Dr. C. Dothanga, Acting VC, ICFAI, Mizoram te pawhin Governor an tawiawm bawk a ni.