1978/2025-2026

Aizawl, the 18th October, 2025: Ruihhlo laka thalaite an fihlim theih nana WATO Trust hmalakna, 'Project Bramhastra' kaltlangin zanin khan Rajiv Gandhi Stadium, Mualpui, Aizawlah 'Football Exhibition Match- Awareness Campaign Against Narcoterrorism' neih a ni a. He hun hi Governor General (Dr) Vijay Kumar Singh, PVSM, AVSM, YSM (Retd) chuan a hmanpui a ni.

Governor General (Dr) Vijay Kumar Singh (Retd) chuan kum kalta maia din chauh, WATO Trust hmalakna Project Bramhastra hnuaia sports hmanga ruihhlo dona campaign hrang hrang Mizorama kalpui a ni chu lawmawm a tih thu sawiin, thupui atana khawvel pum hi chhungkhat vek kan ni, 'Vasudhaiva Katumbakam' tih hmanga Founder & President Dr. Yogita Karache leh a thawhpuite inpekna fakawm a tih thu a sawi a. Khawvel hmasawn zelah buainate pawh khirh chho zelin thangtharte tana hlauhawm tak ruihhloin min runna pawh a rawn nasa telh telh tih tarlangin, ruihhlo chuan muang changin, thawm dim takin kan taksa, ngaihtuahna leh thlarau nun thlengin a khawih chhe hret hret thin a; chhungkua, khawtlang leh ram pum min runa min ei chhe mek zel a ni, a ti bawk.

Mizoram Governor chuan ruihhlo dona movement Project Bramhastra pianna leh bultanna Mizoram a ni chu chhinchhiah tlak a tih thu sawiin, ramri kaltlanga ruihhlo tawlhrukna kawng pui kan nih avangin ruihhlo hneh turin kan zavaia tanrual a tul thu a sawi a. Project Bramhastra hnuaia ruihhlo dona campaign-a basketball team 104 lai an in register chu lawmawm tiin, thalaite chu an hun hman nan khawlai nun hnawla, infiamna tualzawl thlang zawk thin turin a chah a. Mi hriathlawh tak tak te'n Project Bramhastra tuipuia an tawiawm chu fakawm a tih thu sawiin, he project hian sports hmanga mi danglam bik - taksa hrisel, rilru hriam leh thlarau nun thlenga mi chak siam a tum a ni, a ti a. Infiammi, zirlai, milar, nu leh pa leh zirtirtute chu ruihhlo do kawnga tangrual tlat tur leh, Mizoram chu ruihhloin a hneh theih loh State ti a khawvel hriat leh hmuh theiha pho chhuah tum turin a chah a ni.

He hunah hian October ni 17, 2025-a Project Bramhastra 3x3 Basketball Tournament buatsaih taka lawmmante leh scholarship sem chhuah a ni a. Dr. Yogita Karache, Founder & President, WATO Trust leh Brig Puspendar Sorayan, DIG, HQ 23 Sector AR te'n thu an sawi a. Miss Vanlalnuntluangi, First Runner-up, Miss Grand India 2025 kaihhruaiin ruihhlo laka fihlim tura intiamna sawi rual a ni a, Miss Evelyn Zachhingpuii, Miss Universe Mizoram 2025 chuan lawmthu sawiin hun hman a khar a ni.

Zanin Project Bramhastra Football Exhibition Match-ah hian tualchhung mi hriat hlawh tak tak te'n football khelin, infiamna chu intihhlimna mai bakah ruihhlo dona hmanrua a nih tel zia an lantir a ni.

He hun hi Lady Governor Pi Bharti Singh, Arjuna Awardee Pu Prabhjot Singh, former India Hockey player leh Pu Shanky Singh, WWE Superstar-te pawhin an hmanpui a ni.

WATO Trust chuan ruihhloin kan ram nasa taka a run mek laka thalaite chhanchhuah nan Project Bramhastra hmalakna an kalpui mek a. Infiamna chu ruihhlo ngawlveina laka tal chhuahna hmanrua leh inthununna tha tak, rilru leh taksa hrisel nei tura pawimawh a nih vangin, hemi hmanga ruihhlo do hmalak chu an tum ber a ni a. Hemi atan hian Mizoram chu hmalakna hmun pawimawh hmasa atan an thlang a ni.