Vawiin chawhnu  ah khan Mizoram Governor Lt.Gen(Rtd.) Nirbhay Sharma chuan Regional Institute of Paramedical and Nursing Sciences(RIPANS)  a tlawh a. RIPANS a Nurses leh Paramedical Courses hrang hrang zirchhuak te puala buatsaih, Graduation leh Lamp Lighting Ceremony  pawh a hmanpui nghal a ni.

RIPANS Graduation & Lamp Lighting Ceremony ah hian BSc Nursing zir tan tur mi 35 lawmluh an ni a. BSc Nursing  zir zo tawh mi 34, BSc Pharmacy zir zo tawh mi 14,  BSc Optometry & Opthalmic techniques zir zo tawh mi 26 leh  BSc Radio Imaging Technology zir zo tawh mi 27 te hnenah Graduation Certificates hlan na hun hman a ni bawk a ni.

Governor chuan Nurse te leh damlo enkawlna thiamthil zirchhuak thalai te  chu a lawmpui thu sawiin, midang te tanpuina atan an hun pum hmang turin a fuih bakah hna an thawh tan hma hauh atanga an rilru te lo puahchah lawk vek  turin a chah a. An hnathawh tur chu rawngbawlna a nih thu sawiin inpekna thuk tak tello lo phei chuan an hnathawh tur chu hnathawh huphurhawm tak a ni a ti. Nurse te tan chuan an lukhum khum theih chu ropuina a nih thu sawiin sipai tan uniform zahawmna a nih angin Nurse tan pawh Nurse lukhum chu zahawmna a nih bakah mawhphurhna pawimawh tak keng tel nghal ani tih an hriat reng a tul ang a ti. Khawnvar eng in thim a tibo angin Nurse te inpekna chuan damlo te harsatna tam a suat kian sak thin bakah  damna beiseitute tan damna thlentu a nih fo thu a sawi a. Hna zahawm, thawk tu inpe zo, hmelma sipai hliamtuar te pawh thliar hrang chuang lo a ni tih amah ngei in indona hmunah a hmuh tawh thu sawiin an zahawmna leh ropuina chhawm nung zel tura tan la sauh sauh turin Nurse leh Para-medical zirlai te chu a fuih a ni.

A sawizel na ah RIPANS chu, Mizoram tan mai ni lo, North East  India tan rohlu a nih thu sawi a.  He college hi din a nih atangin hmarchhak state hrang hrang atanga zirlai lo kalkhawm ten lungrual taka an thiamthil an zirna hmun a ni a ti. RIPANS chu hmasawn zel tura duhsakna hlan in RIPANS in Dental College leh Medical  College bakah Course thar 20 lai hawn belh a tumna chu ropui a tih thu sawiin an hmalakna te a hlawhtlin thuai a rin thu a sawi a. RIPANS a thawktu te chu Nurse leh Damlo enkawltu mithiam tam zawk chher chhuak zel  tur leh khawvel thiamna sang chho zel mila Nursing  leh paramedical science course hrang hrang te zirtirna her rem zel tur in a chah a. India ram pawn ah pawh tun aia tam zawk mithiam thawnchhuak zel turin duhsakna a hlan a ni.

RIPANS Graduation fuction hi Dr. Chawngthanliana, Director, RIPANS leh Dr. R.Lalduhawmi ten an kaihruai a. BSc Nursing zir tan tur lawmluhna, Lamp Lighting Ceremony chu Pi R.Lalchhanhimi, Principal, School of Nursing, Synod Hospital in a kaihruai thung.  Graduate ni thar te hnenah Graduation Certificates  hlan niin Course hrang hrang a zirlai titha  filawr te hnenah lawmpuina thuziak leh tangka RIPANS in a pek chu Governor in a sem a ni.

RIPANS ah hian BSc nursing, BSc Medical laboratory Technology, B.Pharm, BSc OOT, BSc RIT leh M.Pharm zirtir mek a ni a, tun dinhmun ah zirlai 677 an nei mek a. Seats an neih zawng zawng hi North East India states hrang hrang ten Quota insem in hauh lawk vek a ni a. Tun thleng in zirlai 2064 in RIPANS atang hian thiamna Degree/Diploma an zirchhuak tawh a, India ram leh pawn ah hna an thawk vek tawh bawk a ni. RIPANS ah hian Mizoram in Seats chang tam ber in Seats 59 a nei a, a bak chu : Arunachal Pradesh in seat 14, assam in seat 15, Manipur in seat 15, Meghalaya in seat 15, Nagaland in seat 15, Sikkim in seat 14 leh Tripura in seat 15 an nei mek a ni.