Vawiin ah khan Governor Lt Gen Nirbhay Sharma (Retd.) chuan Directorate of State Council of Educational Research & Training(SCERT) leh Mizoram Shiksha Abhyan Mission hnuaia Model School zing a mi Chhinlung Academy, Vaivakawn a tlawh.

SCERT Auditorium ah hian mithiam kalkhawm te hma ah thu sawiin Mizoram in a neih sa remna leh muanna, boruak hrisel bakah ram leilung hauhsakna te remkhawm a hlawhtlinna thawkchhuak turin mithiam an awm a ngai a; mithiam chherchhuak turin zirna tha zawk erawh a neih hmasak a ngaih thu Governor Lt Gen Nirbhay Sharma (Retd.) chuan a tarlang a. Tunlai khawvel ah chuan ziak leh chhiar thiam an chhawr tlak tawh lova hnathawk atan chhawr tlak ni turin ziak leh chhiar thiam piah lamah Information Technology literate nih tel a ngai a ni a ti. “ Nakin lawk a Mizoram chhunga hna tamtak thawh tur a lo awm anga, kan thalai ten hei chu ka thawk thiam lo tia lo chhang in pawn lam mi an kian zel ang tih ka hlauthawng a ni”, ti in SCERT mithiam te chu zirlaibu siamtu an nih ang leh zirtirtu te zirtirna pe leh chhawngtu an nih anga skill training bakah vocational subjects ti hmasawn turin a chah.

“ India miten Saptawng kan hmanna chhan chu he tawng, khawvel ram tam zawka mi tam zawk tawng tualleng ni bawk hi midang te ruala ke pen ve leh hmasawn kan duh ve chuan thiam a tul vang a ni a. Chutiang bawkin Mizo te pawhin India state dang te leh khawvel ramchangkang zawk te ruala hmasawn kan tum a nih chuan tun aia nasa zawka Saptawng leh Hindi kan thiam a ngai”, ti in hnamdang tawng thiam nal a tul thu Governor chuan a tarlang a. Mizo hnamzia leh hnam rohlu te hluihlawn mai lovin rilru fim tak pu chunga khawhawi zauh a tul a ti.

Governor puala SCERT programme buatsaih hi Pi Laldawngliani Chawngthu, Director, SCERT in a kaihruai a. SCERT hnathawk te leh training mek ten Governor hi kawm zuiin SCERT in an hmachhawp neih mek te, a hlawhtlinna te bakah harsatna an neih te an lo hrilh a ni.

SCERT Directorate ah programme a hman zawh hnu hian Governor chuan Mizoram Shiksha Abhyan Mission Model School zing a mi Chhinlung Academy, Vaivakawn a tlawh in school leh sikul naupang te a en dik. Hetah hian Pu Rodney L Ralte, Secretary to Governor leh Pu P. Lalchhuanga, Secretary , School Education ten tawiawm in Pu Lalhmachhuana, SPD, SSA Mizoram, Vaivakawn khawtlang hruaitute leh zirtirtuten Chhinlung Academy ah hian an lo hmuak a.

School Naupang te a endik hnu in Governor chuan School Office ah zirtirtute nen inkawmna neiin an harsatna leh an hmasawnna te a zawt a. Sikul Naupang te mipuitling a chherchhuah chu hna awlsam a ni lo tiin in zirtirtu te inpekna leh an hnathawh a ngaihsan thu a sawi a. Sikul naupang zawng zawng ten talent an neih a in ang vek lova, an thiamtheih zawng hriatchhuah sak leh chumi hmanga kaihhruai chu zirtirtute mawhphurhna a ni a ti. Pu Lalhlimthanga, Headmaster, Chhinlung Academy leh SSA hotuten Governor hi Class room fan pui in class room hrang hrang ah hian governor chuan naupang te biangbiakna a nei a ni.