2353/2024-2025

Aizawl, the 2nd October, 2024: Mizoram Governor Pu Indra Sena Reddy Nallu chuan vawiin chawhnu dar 3:00 khan Solid Waste Management Centre (SWMC), Tuirial tlawhin hmalakna hrang hrang; Mechanical Compost Plant, Vermi Compost Plant, Waste Resource Center, Waste Incinerator, Common Bio Medical Waste Treatment Plant leh Temporary Holding Area-te a enfiah a, hemi kaihhnawih department hotute a kawm. 

Governor Pu Indra Sena Reddy Nallu chuan khawpui thang zelah hnawm a pun chak avangin a nih dan tur ang taka hnawm lakkhawmte sawngbawl a tul thu a sawi a. Hmasawnna ruhrel lian leh pawimawh tak takte enkawlzui leh tuaihnum kawngah tanrual a tul thu sawiin, harsatna a awm a nih pawhin kan zavaia kan ngaihven tlan a tul a ni, a ti bawk. 

Solid Waste Management Centre Tuirial hi Urban Development and Poverty Alleviation department hnuaia State Investment Programme Management and Implementation Unit (SIPMIU) hmalaknaa North East Capital Cities Development Implementation Programme (NERCCDIP) hmanga sak niin kum 2019 khan hawn a ni a, kum 2022 khan AMC kutah hlan a ni. 

AMC tarlan danin Aizawl khawpui chhunga hnawm sakhatte Pathianni tih loh kar tluana phurh luha sawngbawl thin a ni a, hemi tur hian AMC chuan thawktu 35 a ruai a ni. Nitin hnawm paih truck 190 vel te'n bawlhhlawh Ton 119.42 vel zet SWMC Tuirialah hian an chhung khawm thin a; heng zinga Ton 89.09 hi bawlhhlawh tawihthei (wet waste) niin, adang Ton 30.33 hi bawlhhlawh tawih theilo (dry waste) a ni. Hengte hi sawngbawl niin, nitin dry waste Ton 7.98 vel hi hmannawn (recycle) leh theih turin AMC pawmpui scrap dealer 11 te hnenah hralh thin a ni a, wet waste-te hi Mechanical Compost Plant hmangin kumin March thla atang khan leithaah chantir zel an ni. 

Governor hi Aizawl DC Er. Lalhriatpuia, Municipal Commissioner Pu Joseph H. Lalramsanga, Pu V. Lalruatliana, Dy. CEO, Aizawl Smart City Ltd., Pu Lalremruata Kullai, Jt. Municipal Commissioner leh Official dangte'n an tawiawm a ni.