Vawiin ah khan Governor’s Conference Room ah Larsap Lt.Gen(Rtd.) Nirbhay Sharma chuan OIL, ONGC leh Geology & Mineral Resources hotu te a kawm a. An leiverhna hmunhmate tlawh a tum thu hrilh in an hnathawh mek chungchang leh hmasawnna hrang hrang te a zawt.

Governor chuan kumin chhung ngeiah Mizoram in Hydrocarbon laih chhuah a beisei tawh thu OIL leh ONGC hotute hi  a hriattir a. An hmalakna ah harsatna an neih phawt chuan puih a inhuam reng  a ni a ti  a. An company in vantlang rawngbawlna atana an sih chhuah thin Corporate Social Responsibility(CRF) tanpuina sum pawh thil awm ze nei leh hlawk tham, mipui nawlpui tana tangkai atan hmang turin a chah a. Healthcare leh Youth Skill Training atan CSR chu hmang nasa bik se a hlawk zawka a rin thu a sawi a ni. OIL leh ONGC hotulian te chu Hydrocarbon laihchhuah  a nih hma ngei hian Mizoram in hlawkna a hmuh tur zat te siam fel vek tura hriattir in an hnathawh mek ah Mizoram University hman tangkai dan pawh ngaihtuah tel se tha a tih thu a hriattir bawk.

ONGC leh OIL hotu te hian an hnathawk mek leh thlen chin powerpoint presentation a tarlang in hun rei vak lovah an leiverh na hmun atang hian Boruak alhthei laih chhuah an beisei thu an sawi a. An hmalakna hrang hrang Chief Minister leh a thawhpui bakah mipui vantlang in hmundang anglo takin an tawiawm that vanga an lawm thu an sawi a ni. Kawngpui hmundang aia a tet deuh avang erawh chuan an veivah hun chhung a tum aia a rei thin bakah khawl liantham phurh a harsat thin thu an sawi thung.