Mizoram Kohhran Hruaitute Committee (MKHC) member-te chuan vawiin chawhnu khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) hovin Raj Bhavan-ah Kumthar thingpui inhona an nei.

Governor Lt. Gen. Nirbhay Sharma chuan MKHC hruaituten khawtlanga dinhmun pawimawh tak an luah thu a sawi a. Hmasawnna ruhrel Mizorama tam tak din a la nih dawn avangin, ram pawn atanga hnathawk an lo luh ai chuan thalaite kuthnathawh a zahawmzia kan inzirtir nawn a ngai a ni, a ti. Mihring zat atanga tehin India rama cancer vei tamna ber kan ni chu pawi a tih thu sawiin, ruihhlo, zuk leh hmuam laka mipui an fihlim theihna tura hma lakpui turin a sawm a,  beidawng lova do chhunzawm zel turin a sawm a ni. Chite lui tinung leh tura hmalakna pawh MKHC kaltlanga mipui thlawpna a dil a ni.

MKHC hruaitute chuan kumin inthlan lo awm turah ‘free and fair’ election a awm theih nan, political awareness buatsaih an tum thu an sawi a. Mizo mipuiin kuthnathawh an hreh loh thu leh kuthnathawka eizawng tute pawh an pung chhoh zel thu an sawi a ni.