Vawiin chawhma khan Mizoram Governor Lt Gen Nirbhay Sharma (Retd.) chuan Mizoram People's Forum hruaitute chu Raj Bhavan-ah a kawm a. Governor chuan MPF hruaitute hi thu pawimawh tak tak te lo sawipuiin sawrkar hmalaknate a lo hlawhtlin nan thawhpui ah a sawm a ni.

MPF aiawhtute Rev. Lalzuithanga, Chairman, MPF leh Rev. Dr. Lalbiakmawia, Genaral Sectretary te nena an inkawmna ah hian Governor chuan Disaster Management, khawsak danphung hrisel zawk, Zu leh Ruihlo hmansual, thalai tana hnamdang tawng thiamtir, Natna thalo Aids/HIV bakah kan chhehvel boruak leh leilung enkawl kawng, a bikin Chite Lui thenfai chungchangah kohhran mite thawhpuina chuan hlawhtlinna nasa tak a thlen theih a rin thu a tarlang a. Mizoram a inthlanna felfai tak a awm theih nana MPF hlawhtlinna chu thil ropui tak a nih avangin kawngdangah pawh sawrkar leh tlawmngai pawl te hmalakna ti chak zawngia MPF in theihtawp a chhuah phawt chuan hlawhtlinna a awm ang a ti. MPF hruaitute paw'n Governor chu inthlan kaihhnawih thil baka an hmalakna hrang hrang te, sawrkar hmalakna thenkhat a an ngaihdan te an hrilh a. Mizoram chhunga kuthnathawktute tana buaina lian tak thlaithar hralhchhuahna kawnga harsatna te chinfel a nih theih nan Governor chu chak zawka hma la turin an ngen a ni.