Vawiin khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) leh sawrkar hotute chuan Raj Bhavan-ah inhmukhawmna neiin, skill development chungchang leh Mizoram kawngpui dinhmun te an sawiho.

Governor Lt. Gen. Nirbhay Sharma hovin meeting hi vawi hnih neih a ni a. Meeting hmasa zawk hi Labour, Employment & Industrial Training, Higher & Technical Education leh Mizoram Youth Commission aiawhte nen neih a ni. Governor chuan Mizo thalai lehkhathiam tam tak ten hna an hmulo chu pawi a tih rualin, sawrkar hna in eizawnna a daih sen loh tur thu a sawi a. Mahni kut kea ding thei tura kan inpuahchah a pawimawh hle tiin skill development lama nasa lehzuala tan lak a pawimawh a ni, a ti. Khawtlangah chi leh chi inthliarna neilo mah ila, hna thawh duh bik kan neih tlat chuan kan hriat lohin inthliarna kan siam a ni, a ti. Governor chuan kan ramah eng hna nge thawh tur kan neih zirchian hmasak a, kan mamawh dan a zira vocational training pawh buatsaih tha a tih thu a sawi a ni. Meeting-ah hian National Skill development Policy zulzuia skill development policy Mizoram tan draft tawh a nih thu tarlan a ni.

Mizoram PWD, Project Pushpak leh National Highways and Infrastructure Development Corporation Limited (NHIDCL) hotute nen meeting neih leh niin, Mizorama kawngpui dinhmun thlirhona neih a ni a. Meeting-ah hian sawrkar laipui atangin kawngpui siam that nan sum hmuh a tlem thin avangin, duh anga kawngpui enkawl theih a nih loh thu tarlan a ni a. Km 87.18-a thui, Kaladan Multi-Modal Transit Transport Project pawh 70% thawh zawh a nih thu tarlan a ni.