Vawiin chawhma ah khan Mizoram rawn tlawh mek tu, Vatican sawrkar leh Pope aiawh a India ram a palai hna thawk mek, Archbishop Salvatore Pennacchio, Vatican’s Apostolic Nuncio to India chuan Mizoram Governor Lt.Gen(Rtd.) Nirbhay Sharma tlawh in Raj Bhavan ah inkawmna an nei.

Mizoram chu rammawi leh nuam tak a nih piah lamah ram ralmuang ber  zinga  mi a nih avangin Mizo mipui te an nihlawh hle nia a hriat thu Governor nen an inkawmna ah Archbishop chuan a sawi a. Vatican sawrkar pawh in ramngaw humhalh leh boruak thianghlim siam hi a ngai pawimawh em em a. Hemi chungchanga hmalakna te hi a thlawp a la thlawp zel dawn a, Pope Francis a pawhin United States President Barak Obama te kawm tawh in kan  chenna leh a chhehvel tih thianghlim na chungchang pawh hi a lo a sawipui tawh a ni a ti a. Mizoram Governor  Lt.Gen(Rtd.) Nirbhay Sharma chuan Mizoram in mikhual zahawm danglam bik a nei chu ropui a tih thu sawiin an chhungkua leh Mizo mipuite pawh  thinlung takin Archbishop Salvatore Pennacchio chungah hian  an lawm a ni a ti. Mizoram in ber nihna chhuanawm tak tak a neih zingah ram ralmuang ber a nihn  avang a mi te entawn ber nihna  a hauh thu a  tarlang a. Tuna Mizoram hmelhmang mawi taka siam tur hian NGO’s, kohhran leh khawtlang hruaitute’n nasa takin sawrkar an pui thin a ni a ti. Mizoram in thalai rual fel tak tak tam tak a nei a, chung te chuan thiam thil zir an mamawh bakah tawng thiam, a bik in Hindi thiam an mamawh thu a sawi a. Kohhran-mi leh mipui in an zah em em Archibhop Salvatore Pennacchio te ang michhuanawm te chuan Kohhran ho hnenah thalai rual  tamzawk te eizawnna hmu thei tura chherchhuak  zel turin fuih se zawm leh ngaihven  a hlawh hle in a rin thu a sawi a ni.  Governor chuan India chakna thuruk  chu sakhaw hrang hrang betute inkar a inremna leh in-unauna a nih thu Archbishop chu hrilh in he remna hi a awmzel theihnan theihtawp chhuah puiah a sawm nghal a ni.

Raj Bhavan ah hian Archbishop hi Most Reverend Stephen Rotluanga, Bishop of Aizawl leh Roman Catholic hruaitu ten an tawiawm a ni.