No.7660/2020-2021

Mizoram University(MZU) Convocation vawi 14 leh 15-na chu vawiin February 27, 2021 khan Amphitheatre, University Campus ah hman a ni a. Larsap Shri P.S. Shreedharan Pillai, University Chief Rector ni bawk chuan khuallian niin he hun hi a hmanpui a ni. Convocation vawi 14 na chu hripui len vangin nikum a hman theihloh a nih hnuin kuminah Convocation vawi 14 leh 15-na hi a rual a hman a ni. Covid-19 hrileng darh zel tura laka invenna te leh  sawrkar inkaihhruaina zawm a tul a vangin  kum dang ang loin he hunah hian Gold Medalists, Ph.D dawngtute leh Book prize winner te chauh tel tir an ni a. Sawrkar thuchhuah zawmin Degree dawngtute tawiawmtu an tel thei lo a; MZU hnathawk zingah pawh mi a tlem thei ang ber kalkhawm tur a ruahman a ni a, online a en theih turin live a pekchhuah a ni bawk a ni.

Mizoram Governor P.S. Shreedharan Pillai chuan Covid-19 vanga hun harsa kan tawh laia Mizoram University in Convocation hun a buatsaih thei chu thil lawmawm tak a ni a ti a. Mizoram University in hun reilote chhunga North East mai nilo, India ram chhunga University thang chak ber pawl a ni thei chu Vice Chancellor kaihhruaina tha tak hnuaia thawktu te leh zirlaite thawhrah liau liau a ni tiin MZU hmasawnna atana theihtawp chhuahtu te chungah lawmthu a sawi bawk a ni.

Governor chuan Mizoram dung leh vang a fan chhuah thu te leh mi chi hrang hrang; eizawnna inanglo tak tak te leh dinhmun inanglo tak tak te a kawm nual tawh thu a sawi a. Hengah hian a thil hmuh chhuah tak chu Mizoramah hian ram leilung hauhsakna tam tak, la haih chhuah loh a awm a; a chhunga cheng te pawh hian theihna sang an nei  tih a nih thu a sawi a. Governor chuan hetianga Mizoramin theihna nasa tak a neih lai hian tuna state dinhmun chu a tha tawk lo hle a. Ei leh bar intodelhna kawngah leh state sum thawhchhuah kawngah pawh nasa taka tan lak la ngai a ni tih sawiin he hunah hian vawiina Degree nei thar mithiam te leh Zoram thalai theihna sang tak nei te hi an rawn pen chhuah a ngai a ni, a ti.

"Mizoram in a nih tur ang tak thleng thei tur chuan economic development, industrialization, revenue generation, employment creation ah te nasa zawka tan kan lak a ngai” tiin a sawi a. Thalai lehkhathiam rual vawiina kalkhawmte hian heng hmasawnna thlen tir thei tur chuan hma an hruai a ngai a ni a ti. Governor chuan Mizoram tan hmasawnna kawng zawh turin thil tul hmasa tlem a zawng a awm tih a sawi a. Hriselna kawngah nasa taka tan lak hmasak a ngai a – natna khirh : Cancer leh Aids/HIV bakah ruihlo avanga harsatna thleng mek te hi hmasawnna than ti thu tu a ni a; nuaibo hmasak a ngai a. A dang leh chu state mipui ten kan thatna leh hlawk zawk na turin midang te thawhpui thiam leh kan khaw hawi tun aia ti zau kan la mamawh a ni, a ti.

Prime Minister Narendra Modi-a vision pawimawh em em mai, “India, ram intodelh(Atmanirbhar Bharat)” chu “Mizoram, State intodelh”  tih nen pawh a inmil hle niin a sawi a. A chhan chu Mizoram hian State Intodelh ber ni turin mamawh engkim a nei sa vek a – sik leh sa a nuam a, a ram leilung a thain thlai chi tinrengin a ngeih a, achhunga thing leh mau te pawh tangkai taka hman theih a nih bakah  a chhunga cheng mipuite pawhin theihna sang tak an nei tel a ni a ti. Heng zawng zawngah hian Governor chuan a chhunga chengte theihna leh thiamna( Human Resources) a pawimawh ber tih a sawi a. Mizoram hmasawnna kawngzawh turin thalai, a ngaihna hria te an thiamna leh theihna hmang tangkaia an rawn penchhuah a ngai a. Chung zingah chuan vawiin mithiam duhawm tak tak Degree nei thar te pawh telin Mizoram hmasawnna tura an hmaa chona awm mek hi huaisenna, taihmakna leh tumruhna nen an hmachhawn a ngai a ni, a ti.

He hunah hian Governor chuan mipui te Hripui leng a la tawp mai lo tih hre reng tura chahin kan zavai atana himna tur Sawrkarin a tul anga inkaihhruaina a rawn siam thin te pawh tha taka zawm chhunzawm leh turin mi tin te a chah nghal bawk a ni.

Mizoram University hi kum 2000 kum a din niin, National National Assessment and Accreditation Council (NAAC) chuan 2019 leh 2024 inkar atan Grade 'A' a pe a. National Institution Ranking Framework (NIRF) in ramchhunga university tha a thlanchhuah zingah kum 2020 atan Mizoram University chu 67- a dah mek a ni. Convocation vawi 14 leh 15-na ah hian Mizoram University Vice Chancellor Prof. K.R.S. Sambasiva Rao chuan zirlai hlawhtling mi 9740 hnenah Degree a pe thar a. Heng zinga mi 167 te chu a hmuna Degree dawng turin an rawn tel thei a. Degree dawng tura Convocationa rawn tel thei mi 167 zingah hian Doctor of Philosophy dawngtu mi 98, Gold Medalist 63 leh Book Prize Winner mi 6 an awm. Mizoram Governor P.S. Shreedharan Pillai, Mizoram University Vice Chancellor Prof. K.R.S. Sambasiva Rao leh MZU Registrar, Prof.Lalnundanga ten Degree leh award te hi an sem a.MZU Registrar Prof.Lalnundanga chuan lawmthu sawina hun a hman hnuiin Vice Chancellor phalna lain MZU Convocation vawi 14 leh 15-na chu a khar a ni.