Faina Hapta (Cleanliness Week) pualin Govt. Aizawl College chuan vawiin (October 1, 2019) khan an college chhung leh a chhehvel tifaiin nilengin Faina Ni (Cleanliness Day) hmangin an hnatlang a, hnatlangah hian zirtirtute leh zirlai thahnem tak an tel a. College-a Youth Adventure Club (YAC) ten hruia inkhaiin college bang leh tukverh darthlalangte an tifai bawk a ni.

College tuala hnatlang hawnna inkhawm tawi neih a thusawitu college Principal Prof. C. Sangluaii chuan college zirlaite zingah faina leh thianghlimna nunpuitute chu kawng dangah pawh mi hlawhtling an ni thin a ni a ti a. Mahni college leh a chhehvel vawnfai tumna rilru pu pha lo tan chuan hlawhtlinna pawh umphak a harsat a rin thu a sawi. Tunlaiin college zirlaite chu awmdan mawi leh nundan tha (manners & etiquette) hriat leh zawm kawngah an hniam tawlh tawlh mai niaa a hriat thu sawiin, hemi kawng thu ah hian Govt. Aizawl College zirlaite chu zirlai dangte aia ‘zirlai danglam bik’ ni turin a fuih a; awmdan mawi leh nundan tha hi faina nen pawh thui tak a inzawm tlat a ni a ti. Aia upate, nu leh pa leh zirtirtute lakah zahna lan tir uar turin zirlaite a hrilh a, Mahni zirtirtute lakah pawh zahna lantir nachang kan hre tawh lo anih si chuan tudang lakah nge kan lantir tawh chuang ang? a ti a ni.

Govt. Aizawl College hian Mualpui ramah college hmun thar an puahchah mek a, an college hmun thar turah hian thingphun hnatlangte pawh an lo nei tawh thin a ni.