Vawiin khan Govt. Aizawl West College-a Fitness Centre chu Pu C.Laltlanthanga, Secretary, Mizoram State Sports Council chuan a hawng.

Pu C.Laltlanthanga chuan, "Health & Fitness hi ram changkang apiangin an ngai pawimawh a, khawvel huapa lar pha leh ngaihsanawm tak takte phei chuan Health & Fitness mai bakah, taksa mawina leh nalhna an ngaipawimawh em em a ni. Sum leh pai hman sen loh pawh nei mah ila, kan hrisel si loh chuan awmzia a awm lova, kan taksa kan tihchak a, hriselna bakah kan taksa nalhna tur thlenga kan ngaih pawimawh a ngai a ni" a ti. 

"Sawrkarin sports hmasawnna a ngai pawimawh a, Mualpuiah infiamna engkim leng thei tur khawpa lian leh tha R.Dengthuama Multipurpose Indoor Stadium te, Hawla Indoor Stadium bakah hmun hrang hrangah infiamna hmun hma siam zel a ni a, Gym leh Fitness Centre engemawzat bunfel a ni tawh bawk. Chutiang kara Aizawl West College-in Fitness Centre in siam puitling thei ta hi ka lawmpui che u a, zirlai leh zirtirtu ten tangkai taka in hman ka duh a ni" a ti bawk.

AWC Fitness Centre hawnna inkhawm hi Dr. Laithanzauva, Principal, Govt. Aizawl West College chuan a kaihruai a, report petu Dr. B. Lalrinsanga, Co-ordinator, IQAC chuan Mizoram sawrkar hnuaia college bikah Aizawl West College chu Fitness Centre nei hmasa ber a nih thu leh University Grant Commission (UGC) atanga Fund an hmuh Rs.19 lakh atanga Fitness Centre an siam thu a sawi a. Pu V. Zothankhuma, Coordinator, Sports & Youth Activities Cell chuan report pe bawkin zing leh tlaiah College zirlai leh zirtirtute tan hman theih tura ruahmanna an siam thu a sawi ve bawk.

Attachment

  • Loading attachment...