Vawiin chawhma khan Govt. Aizawl West College ten Fresher’s Social 2019 lawmna hun  Vanapa Hall-ah an hmang a, Dr R Lalthangliana, Higher & Technical Education Minister chu khuallian niin he hun hi hmanpui.

Minister Dr R Lalthangliana chuan kan ram leh hnam hmasawnna leh dinchhuah zelna kawngah zirlaiten mawhphurna pawimawh tak an neih thu sawiin an lehkha zirnaah theihtawp chhuah turin a fuih a,” Harsatna leh kan hmaa mawhphurna awmte hi huphur a kal san tum mai lovin ‘ka tithei ve ani’ tih rilru pu chunga beidawn tum lova hmachhawn zel hi hlawhtlinna min thlen tu a ni” a ti a, zirlaite zingah chawrchhuahna inanloh avanga zirnaa hnufual bik tura inngailo turin a chah a, hunbi vawng tha tur leh hun awl an neih ang angte tangkai taka hmang thiam turin a fuih bakah Social media leh computer games ahte hun khawhral tamlo turin a chah bawk.

Vawiin Govt. Aizawl West College Fresher’s Social chawhma hunah hian Dr P Lalremliana, Principal chuan College chanchin leh dinhmun tlangpui a tarlanga, zirlai atanga thusawina hunte buatsaih a nih bakah zirlai titha te hnenah lawmpuina thil pek hlanna hun hman a ni bawk.

Govt. Aizawl West College hi kum 1990 a din niin National Assessment and Accreditation Council in June 2017 a  3rd cycle endikna an neih ah khan B+ grade an pe a. College ah hian Bachelor of Arts zirna department hrang hrang 8 awmin chungte chu History, Political Science, Public Administration, Economics, Education, Psychology, English leh Mizo te a ni a zirlai 806 an awm mek a ni. Mizoram University Affiliation Committee chuan History subject bikah Post Graduate course zirna hawng thei turin Govt. Aizawl West College hi phalna alo pe tawh a, kum 2020 atangin zirna hi tan thei turin hmalak mek a ni. College ah hian class room 14, Auditorium, Library, Cafeteria, NSS room, IQAC room leh Legal Aid Clinic room te awmin Teaching staff 35 leh Non-teaching staff 15 an awm mek bawk a ni.