Vawiin khan Parliamentary Secretary Pu H. Zothangliana’n Bawngkawn Brigade Area-a Govt. J. Thankima College building sak thar tur enpuiin, hna thawh bul tan nan bawngtuthlawhin a laihna hmun tur a chek. Hemi hnu hian DoNER Ministry atanga College building sakna tur sum cheng nuai 85.77 an dawn, hmanga sa turin Mizoram PWD hmalakna angin JCB hmangin College building sakna hmun tur lei laih tan nghal a ni.
Pu H. Zothangliana chuan inkhawmna tawi teah thu sawiin, Mizoram sorkar-in zirna a ngai pawimawh em em a, chu mi avang chuan he College building thar pawh hi sak a lo ni dawn ta a ni a ti. Govt. J.Thankima College Principal leh thawktu dangte thahnemngaihna chu chhuanawm a tiin, College-a zirlaite pawhin taihmak chhuaha hlawhtling ngei tura zir turin a chah a. Nungchangin a zir loh chuan thiamna, finna leh degree sang tak tak neih ringawt hian awmzia a nei thui lova, chuvangin zirlaite chu an zirna kawngah an nun hmang fimkhura uluk turin a fuih nghal a ni.
Govt. J.Thankima College Principal Pu Ramhmangaiha Ralte chuan College building an sak tur chungchang sawiin, chhawng 5-a sang tura duan a ni a, building dung hi ft. 120-a sei, a vang ft. 60 tur niin, building-ah hian Class room bakah Computer Centre, video conferencing hall, office hrang hrang leh library te pawh dah tum a nih thu a sawi a. A remchan angin Indoor Stadium pawh UGC atanga sum an hmuhin sak thuai an tum bawk a ni.
Brigade Area-a sorkar hmun pawimawh dah tura Mizoram sorkarin a ruahman zingah Govt. J.Thankima College hi ram pek a ni a. Mizoram sorkar-a Cabinet Meeting-in ram pe tura a rel hnuah heng lai hmunah hian mi mal LSC/Pass a awm avangin building sa thei lovin harsatna an tawk a. Chung Pass nei zinga pakhat - Pu David R.Lalsawmtluanga chuan zirna hmasawnna leh Mizoram thalaite hmakhua tur a nih avangin ui lovin a pass chu College hnenah a hlan a ni. Tichuan, Mizoram sorkar leh Aizawl Municipal Council leh thuneitute hnen atanga phalna lak ngai tihfel a nih hnuah helai hmunah hian College building sak tan theih a lo ni ta a ni.
Brigade Area-a sorkar hmun pawimawh dah tura ruahmannaah hian Mizoram sorkar tha tichak turin Brigade Area Protection Squad a din a. He Squad hian helai hmun bakah College building sakna tura hian sorkarin thuneihna a pek angin theihtawp chhuahin hma an la a; Mizoram sorkar ruahmanna anga sorkar hmun pawimawh awm tur zinga Govt. J. Thankima College hmanga Mizoram sorkarin bul a tan ta hi a lawmawm hle a ni.
Parliamentary Secretary hi College Principal, Lecturer, Bawngkawn Brigade Area Protected Squad hruaitute bakah Revenue Joint Director leh thawktu dangte’n an tawiawm a ni.
