Govt. J. Thankima College chuan vawiin khan Chanmari YMA Hall-ah College Week kharna hun an hmang a. Parliamentary Secretary to CM Pu Lal Thanzaran a hmanpui a ni.

Khuallian Pu Lal Thanzara chuan College hun hi nakin hnua mahni kawng zawh tur thlan thiam leh thlan fuhna hun pawimawh tak a ni tiin tuna he college a zirlai mekte chu an nakin hnu tur uluk taka thlira rilru fim tak nen thutlukna siam thiam turin a chah a ni. Parliamentary Secretary chuan Mizote hi a huhoa khawsa thin, kawng hrang hrangah pawh a huhoa hmala ho dial dial thin kan nih avangin zirna kawngah pawh thiante subject thlan ang thlang ve mai a mahni tui zawng leh mil tur pawh ngaihtuah lem lo a zir thin kan nih hi bansan a hun tawh tiin, mahni mil leh tui zawng dik tak thlan thiam a pawimawh a ti a. Tunlai thangtharte zinga aia upa zahna a tlahniam ta nia a hriat thu sawiin heihi zirtirtute chu a hrechiangtu an ni ang a ti a. Chuvangin pipu atanga thil tha kan chhawm aia upa zawh inzirtir thar a hun a ni, a ti bawk.

Pu Lal Thanzara chuan Mizoram chu mahnia Education Reforms nei awmchhun a ni tiin Education Reforms tana Rs. 700 crores pek chu zirlaite hmakhua tur a ni a ti. Sorkar Flagship Programme NLUP hmanga Mizorama chhungkaw nuai khat leh singhnih tanpui anih tur thu leh hetiang zat chhungkua in hamthatna an hmuh mek leh an la hmuh zel turah lawmawm a tih thu a sawi a. Khuallian chuan zirlai kalkhawmte chu sorkar hmalaknate hrethiam turin a cha a. Aizawl khawpui kawng siam that vek anih tur thu leh tunah hian Mizoram chhung kawng siam nan Rs. 200 crores chuang chu Central sorkar-in Mizoram pek a tum thu a sawi bawk a. Bawngkawn Brigade hmuna J. Thankima College building tha taka sak anih theih nan kalkhawmte tanpui a inhuam thu a sawi bawk.

Vawiin hun hi session hnihah then a ni a. Hetah hian College Week a ti tha te, Zoram pum huap infiamnaa ti thate leh zirlai 2012 session chhunga kalkimte hnenah lawmman sem a ni.

J. Thankima College hi 1992 khan din tan a ni a, a hnuah Lalhmingthanga College nen insuihfinin J. Thankima College tih a lo ni ta a. 2002 khan deficit dinhmunah hlankai a ni a, tichuan 2007 khan provincialised niin kumin 2012 hian zirlai naupang 716 an awm mek a ni.

J. Thankima College hian Hmeichhe Hostel, South Campus Durtlang Mel 5 ah a nei a, tunah hian Bawngkawn Brigade ramah College main building cheng nuai 85 chuang man sa tura hmalak mek a ni.