No.4233/2021-2022
Aizawl, the 11th March, 2022: Nimin khan District Disaster Management Authority (DDMA), Khawzawl District leh National Service Scheme (NSS), Government Khawzawl College-te tangkawp chuan College zirlai leh thawktute tan chhiatrupna hmachhawn dan inzirtirna, 'Capacity Building Training for Response to Disasters' an buatsaih. He hun hi Pu C.C. Lalchhuangkima, Deputy Commissioner & Chairman, Khawzawl District Disaster Management Authority chuan khuallian niin a hmanpui.
Training hawnna hun College Multipurpose Hall-a neihah District Bawrhsap Pu C.C. Lalchhuangkima chuan thu sawiin, thalaite chu chhiatrupna a thlen changa a ngaihna hria leh che chhuak tura beisei an nih avangin thahnemngai leh tihtakzeta training tur te, an thil zirchhuahte chu mamawhtu midang hnena hrilhchhawng zel tur tein a sawm a. Khua a thal chho a, kangmei chhuah duh hun lai a nih chhoh avangin kangmei ven kawnga theihtawp chhuah theuh tur leh, kangmei chhuak an hriat chuan VC leh YMA te hnena hrilhhre vat thin turin a chah a. Government Khawzawl College chu luh chakawm taka siam turin zirlai leh thawktute chu thahnemngai taka thawk sauh sauh turin a sawm nghal bawk.
Vawiina training-ah hian Khawzawl DDMA hnuaia Quick Response Team member-ten chhiatrupna a thlen changa mipui vantlangin chhanchhuah hna an thawh theih dan, 'Community-based Search and Rescue' technique hrang hrang an entir bakah First Aid chungchangte, hliam tuar zawnna siamchawp dan te, chhanchhuah hna thawh nana pawimawh hmanraw hrang hrang sawifiahna leh a hman dan inzirtirnate an pe a. Heng inzirtirnaahte hian zirlai naupang a tam thei ang ber a taka tihtir ve zel an ni.
Pu H. Lalramenga, Sub-Deputy Commissioner & Nodal Officer, DM&R chuan powerpoint presentation hmangin lirnghin laia tih tur leh tih loh tur te, India rama Disaster Management nihphungte zirtirna a pe bawk.
Vawiina training-ah hian Government Khawzawl College-a zirlai leh thawktu mi 100 bawr vel an tel a. Pu K. Ziona, Principal, Government Khawzawl College-in kalkhawmte lawmna thu sawiin, Pu Lalchhanchhuaha, Assistant, DC Office-in lawmthu sawiin training a khar a ni.
Attachment
- Loading attachment...
