1366/2022-2023

Mamit 26th July, 2022 : India ramin zalenna a hmuh Kum 75-na (Azadi ka Amrit Mahotsav India @ 75) pualin vawiin khan Chhimveng YMA Hall, Mamit-ah Govt. Mamit College-te chuan Seminar an nei a. Pu Lalfakzuala, MCS, Addl.DC, Mamit chuan khuallian niin he hun hi a hmanpui. 

Pu Lalfakzuala chuan AKAM pawimawhzia leh 75yrs Freedom kan lawmna-a Freedom Fighter hriatrengna neih a pawimawhzia sawiin, Mizo history pawimawhzia bakah zirchian leh hriat belh tur tam tak kan la neih thu kalkhawmte hnenah a sawi. 

Resource Person Pu Omega Vanlalduata, Assistant Professor, Department of Mizo, GMC chuan Lalsuthlaha chanchin sawiin, a huaisenzia leh hnam a hmangaihzia te, Mizote tan lal ropui tak a nih thu leh Mizote tana ram chhan nana nunna chan hmasa ber a nih thu a sawi a. Sawihona hun hlimawm tak neih zui nghal a ni bawk. 

He hunah hian Pu M.S Dawngliana Hnamte, Principal, GMC chuan Introduction leh Welcome Speech pein Pi Hmingsangzuali Lushai, Associate Professor chuan Keynote Address a pe bawk. 

He programme hi Art & Culture Department, Higher & Technical Education Department leh Govt. Mamit College te tangkawpin an buatsaih niin Pu Joseph Duhlian, Associate Professor, GMC-in he hun hi a kaihruai a. Pi L. Ramchullo, Associate Professor, Department of History chuan lawmthu sawina a nei bawk.