Vawiin khan Govt. Hrangbana College chuan National Assesssment and Accreditation Council (NAAC) in Grade ‘A’ a pek lawmna leh zirlai thar te pual (Freshers Social) chu an college Golden Hall-ah an hmang a. Mizoram Legislative Assembly Speaker Pu R.Romawia leh he College atanga zirchhuak Health Minister Pu Lalrinliana Sailo ten an hman pui.
Speaker Pu R. Romawia chuan UGC in accreditation ti tura a ruat NAAC hnuaia mithiam kalkhawmin uluk taka kawng hrang hranga teha an buk hnuah Govt. Hrangbana College chu Mizorama a hmasaber atan Grade ‘A’ nihna an pe chu ropui a tih thu leh a ram ang pawha chhuanawm a tih thu a sawi a. Zirna hian changkanna leh eizawnna tha min pek piah lamah mihring nun pawtsei tu a ni a, chuvangin tih takzeta thahnem ngai taka lehkha zir turin zirlai kal khawm te a chah a, mihring theihna haichhuaktu resource pawimawh tak min pe tu a ni,Pu R. Romawia chuan a ti. Mahni hmakhua chauh hai lova midang te tana nun hlan tu ni tura fuihin pi leh pu atanga Mizo te nunmawi tlawmngaihna, thian chhan thih ngam, huaisenna leh a dang te chawinung zel turin zirlai te a chaha, chu chu Mizo hnama chianna (Nationalism) dik tak a ni, a ti. Kohhrana petu thinlung kan put te, YMA anga tanpui ngai te tanpui duhna thinlung kan put ang bawk hian sorkar lakah pawh kutdawh thinlung put bansana sorkar tana thil tha tih duhna thinlung pu theuh turin Speaker chuan kalkhawm te a chah a ni.
Health Minister Pu Lalrinliana Sailo pawhin thu sawiin sorkar chuan zirna (education) pawimawhzia hriain theihtawp chhuahin tan a la a, hmasawnna ruhrel (infrastructure) dinna kawngah leh zirtirtu lakbelh kawngah pawh nasa takin tan a la a ni, a ti. Zirlai te chu hun tha an neih laia theihtawp chhuaha tang tura fuihin tumruhna, taimakna, insumtheihna leh thanhnemngaihna a pawimawh, a ti a. Dai pelh hlek tawh an awm anih pawhin beidawng mai lova rinawm taka tumruhna nen an tan phawt chuan hlawhtlinna an hmu ngei ang tiin Pu Lalrinliana Sailo chuan zirlaite chu hlawhtling turin theihna an nei tih inhre turin a chah. Grade ‘A’ Accreditation an hmu chu zirlai kaltawh te, zirmek te leh zirtirtute thawh rah a ni tiin a kal mek ten hetiang dinhmun chhuanawm tak an thleng hi vawng nung reng turin leh a aia sang hmu thei tura tan la sauh sauh turin Minister chuan a fuih a ni.
He hunah hian Speaker Pu R. Romawia hian Govt. Hrangbana College 31st Annual Magazine (2011-2012) a tlangzarh nghal bawk.
Freshers Social &Celebration of ‘A’ Grade Accreditation programme hi Hrangbana College Principal Pu K. Liantuala chuan a kaihruai a. An College zirtirtu, tunhnaia National Institute of Electronics and Information Technology (NIELIT) a training chhuak te hnenah Certificate hlan an ni bawk.
Hrangbana College hi 1980 a din niin kum 2006 khan NAAC hian ‘B++’ Accreditation an lo pe tawh a. 2011 khan September thla khan NAAC peer team in uluk taka an endik hnuah dinhmun sang zawk Grade ‘A’ nihna chu March 11, 2012 khan pek leh an ni. Tun dinhmunah Mizoram College zingah Gradec’A’ hmu pha awm chhun a la ni. Tunah hian zirlai 2056 an awm a, zirtirtu 63 leh thawktu dang 19 awmin Arts leh Commerce zirna hmunpui ber pakhat a ni.
