Kumin 2017 University exam a department 22-a topper-te chawimawina Mizo Students’ Union (MSU) in vawiina an buatsaih chu Chief Minister Pu Lal Thanhawla chuan khuallian niin a hmanpui. He hun, Lal Thanhawla Auditorium-a hmanah hian Pu Lalrinmawia Ralte, MLA chu khualzahawm a ni. 

Chief Minister chuan graduate topper-te chu an hlawhtlinna a lawmpui thu leh, an kal zelna turah pawh an naute tana entawntlak leh Zofate ti hmingthatu an nih a beisei thu a sawi a. Zirna kawnga titha ber dinhmun hauh tur chuan thawhrimna tak tak leh rinawmna nen beih a tulzia sawiin khuallian chuan heng zirlai tithate chawimawi nachang MSU ten an hria chu lawmawm a tih thu a sawi bawk. Thalaite chu nakin lawka khawtlang leh kohhranah te hruaitu la ni tur an nih avangin an nun uluk turin leh zuk leh hmuam a fihlim a, ei leh in thlenga fimkhur thin turin a chah a. Mizo ten awmdan mawi (manners and etiquette) lamah hmasawnna tur tam tak kan neih thu te sawiin, ‘exposure’ nei thalo pawhin a inzir chawp vek theih thu leh, a hun leh hmun mil a awm dan tur kan hriat chuan midang lakah ngawi rengin kan hnam kan chawimawi thei a ni, a ti a ni. India ramah Mizoram chu thalai nei ngah ber pawl kan nih thu sawiin Chief Minister chuan heihi kan state economy hmasawnna atan thil tha tak a nih rualin thalai eizawnna lama inhmang miahlo awm awl mai mai kan awm thluah erawh chuan ram hmasawnna tithuanawmptu a nih theih thu leh, chumi atan chuan Sorkar pawhin  thalaite hmakhua ngaihtuaha zirna in leh infiama lam bakah ‘entrepreneurship development’ lamah te hma a lak thu a tarlang a. Heng zawng zawng hlawhtlinna erawh chu a chhawr tangkai theitu thalaite thahnemngaihna leh taimakna ah a innghah thu sawiin Chief Minister chuan heng ‘opportunity’ te hi a lo thlawnah chantir mai lo tura a duh thu a sawi a ni. 

Khualzahawm Pu Lalrinmawia Ralte chuan thu sawi bawkin, zirlai pawl hruaitu ten an tih tur dik tak hriaa an zirlai pui tithate an chawimawi chu lawmawm a ti a. Zirlai nih chhung chuan thalaite chu an zirna an ngaihpawimawh a tul thu sawiin, an zirna tibuai theitu hrang hrang laka an fimkhur a pawimawh thu sawiin, chung zingah chuan tunlaia langsar ber chu mobile phone a nih thu tarlangin, Pu Lalrinmawia chuan thil tul leh pawimawha inbiakna tur a ni tih hre rengin, lehkha zir theihloh phah nen te, men rei phah nan te leh midang tihbuai nan a an mobile phone-te hmang mai mai lo turin zirlaite a chah a. Zirlai pawla inhman chungchangah pawh mahni hma hun (future career) tichhe khawpa inhman a awm theih avangin fimkhur turin a chah bawk. 

Graduate topper chawimawina hunah hian MSU chuan zirlaite hmakhua ngaihtuahna kawngah thawhhlawk mi pathum an thlan – Pu Lalbiakzuala, President, CYMA; Pu Bualhranga, Ex-MLA leh Pu Lalhruaitluanga, Managing Director, Zocareer te chu chawimawina an hlan a ni. Vawiin hunah hian MSU President Pu RB Lalmalsawma bakah chawimawite atangin leh CYMA, MZP, MHIP leh MUP atangin thusawi ngaihthlak a ni. 

Graduate Topper chawimawina dawngtute chu heng mite hi an ni: 

Economics – Lalrammuani Hnamte (PUC)

Education – Ignes R. Lalmuanpuii (PUC)

English – Shirley Lalrinfeli (PUC)

Geography – Imanuel Lawmchullova (PUC)

History – Lalmawizuali (PUC)

Mizo – Vanlalhrilha (PUC)

Philosophy – Grace Zothansangi (PUC)

Political Science – Vanlalsanga (GSC)

Psychology – Esther Vanlalhmangaihi (HBC)

Public Administration – H. Vanlalvenzuali (PUC)

Sociology – Euniki Zothankimi (PUC)

Commerce - Dominic Vanlalruata (HBC)

Home Science – Zothanpuii Pautu (GZRSC)

Biotechnology – Vanlalhruaii Famhawite (PUC)

Botany – V.Vanlalruati (LGC)

Chemistry – V.T.Krossbiesa (PUC)

Environmental Science – M.C. Lalropeki (PUC)

Geology – Lalremtluangi (PUC)

Mathematics – Reuben Lalremruata (LGC)

Physics – Samuel Lalchanhima (ZRSC)

Statistics – Vanlalhriatsaka (PUC)

Zoology – Mary Lalruatsangi (PUC)