Vawiin khan  Mamit-ah Green Mizoram Day 2011 hman a ni a. He hun hi Pu Zothankhuma, IAS, Deputy Commissioner, Mamit chuan a hmanpui a ni.

Hawnna inkhawm tawi DC's Office, tualzawla neihah thusawiin DC chuan kan khawvel lo lum chho zelah thingphun uar deuh deuh a tul thu a sawi a, chu chuan ramsate leh chungleng savate tan malsawmna a thlen thin a ni a ti a. A sawizelna-ah tuna thing tiak kan phun turte leh thing awmsa te hi uluk taka kan enkawl a tul thu leh chu chu mitinte mawhphurhna a ni tiin kalkhawm te chu chumi lam hawia hma la sauh sauh turin a chah a ni.

He inkhawmah hian Ramngaw humhalh a tulzia chanchinbu-a ziak thate hnenah lawmman sem a niin 1st Mamit Times,  2nd  Mamit Post leh 3rd Lentupui Newspaper an ni a. Zotlanglentu, Zolamtluang leh Mamit Express ten Consolation Prize an dawng bawk.

Vawiin Green Mizoram Day hmanna-ah hian Mamit leh Bairabi inkar kawngpui sir, Mamit atanga Km 3 leh Km 5 inkarah thiang tiak 215 phun niin hung nghal vek a ni bawk a, hetah hian Sikul naupang, Tlawmngai Pawl leh Sorkar hnathawk te mi 300 chuang an thawk a ni.

Heng bakah hian Green Mizoram Day 2011 pual hian Mamit khawpui chhunga Department 7 te chuan anmahni Compound-ah thing tiak an phun a ni. Mimal engengemaw zatin Green Mizoram Day denchhen hian Forest Department atangin thing tiak hi an la a. Thing tiak hi a vaiin 2500 sem chhuah a ni bawk.