Mizoram puma thing leh mau phun uar nana kum 1999 atanga sorkar hmalakna kal zel Green Mizoram Day chu kuminah pawh hman leh ngei tura rel a nih angin vawiin khan Green Mizoram Day 2013 Sub-Committee chu an Chairman Parliamentary Secretary Pu Lal Thanzara hovin Chief Minister’s Office Conference Hall-ah an thukhawm a ni.

Vawiina Sub-Committee thurel zingah Green Mizoram Day chu June ni 11, 2013 (Thawhlehni) ah hman an rawt a, he Ni-a inkhawm pui ber chu ICFAI University Campus, Durtlang-ah nghah nise tiin rel a ni bawk a. Green Mizoram Day hmannaah hian Mizoram Chief Minister Pu Lal Thanhawla chu khuallian ni tura beisei a ni bawk a ni.

Green Mizoram Sub-Committee Chairman Pu Lal Thanzara chuan sorkar department hrang hrangten bial chan bik nei a thingphun hnatlang an neih thin chu tih chhunzawm zel tha a tih thu leh an thingphun te an vil ngun leh ngun loh endik tura monitoring committee din pawh a that thu a sawi a. Hei hian nasa takin thingphun in boruak, sik leh sa a humhalh leh vawn dik dan mipuite a zirtir thei dawn a ni, a ti. Heng bakah sikul naupangte leh tlawmngai pawl hrang hrangte pawh thingphun uar tura inzirtir chu tih makmawh a ni, a ti bawk.

Kumin Green Mizoram Day atan Environment & Forests Departmnet chuan thing tiak 6,40,250 a lei tawh a, hei hi Mizoram district tinah sorkar department, tlawmngai pawl te leh zirna in hrang hrangte hnenah phun tura sem darh a ni dawn a ni.