Kum 17 lai tha leh zung senga hma kan lak ho thin na, Green Mizoram Day kanlo thleng leh ta a. He Ni pual hian Zoram mipui zawng zawngte chibai ka buk a che u.
Mizote hi Pathianin kan chenna awm tak ramah min dah a, sik leh sa thu-ah te, ruahtui hnianghnar leh thing leh mau awmna ramngaw bakah, nungcha chi tinreng awmna hmunah min hung a. Kan vanneih teh reng nen, heng thil hlu leh tangkai tak takte hi kan fimkhur loh leh inthlahdah leh a nachang kan hriat loh vangin kan ti chereu nasa ta em em a. Chutiang tho chuan khawvel hmundangah pawh ramngaw a chereu sawt em em a, hemi avang hian boruak lum zel (global warming) in min tuam a, hmun thenkhata khawlum lutuk, ruahtui mumal lo, tuihna kang tial tial kan tuar laiin hmun thenkhat ah chuan tuilian nasa tak takin chhiatna a thlen mek bawk a ni.
Hetianga sik leh sa, ruahtui mumal lo hi siamthat leh dan tur ngaihtuahin Mizoram Sorkar chuan kum 1998-ah Green Aizawl Committee a din a, chu chu huam zau zawka kalpui a nih theih nan, a kum leh ah chuan Green Mizoram Programme-ti a thlak alo ni ta a. Kumin hi kan hman tirh atangin a kum 18-na lai a lo ni ta. Kum 2014 atang phei kha chuan sorkarin June 11 hi Green Mizoram Day atan a puang ta nghe nghe a ni.
He programme hi kum tin Sorkar Department hrang hrang te, Zirna in te leh NGO hrang hrang te, Kohhran ho ten, thahnemngai takin kan hmang tlang thin a. Hetianga thahnemngai tu zawng zawng te hnenah thinlung takin lawmthu ka sawi a ni. Hun lokal zel turah pawh Green Mizoram programme ah theih tawp chhuah zui zelturinka ngen nghal bawk che u a ni.
Green Mizoram programme hnuaiah hian thingtiak nuai sawmli chuang zet semchhuah tawh leh phun ani a. Mizoram chhunga district tina hmalakna leh a hlawhtlinna pawh kumin atang chuan ngun lehzuala vil mek ani. District tinah Monitoring Committee din ani a, Deputy Commissioner leh DFO te kaihhruaina hnuaiah YMA, MJA leh sorkar official te member an ni a, he programme ti hlawhtling tur in hma an la thin a ni.
Green Mizoram programme a thing phun te hi kangmei lakahte, ran lakah te mihring kuthlei lakah tekanvenhim a pawimawh hle. PWD leh kawng siamtu contractor leh company-a hnathawk tu ten kawng an enkawl na ah, kawng sira thing phunte hi an dim thiam a pawimawh hle a ni. Lo leh huan neitu ten lo an hal avangin kawngsir thingphun tamtak an hal hlum thin. Kawng reserve zuah lo a, kawng thlenga lo leh huan vah thin hi dan kalh ani. Tun atang chuan hlawhtlinna nasa zawkkanhmuh theuh theih nan Zoram mipui zawng zawngte tan la a, Green Mizoram hnuaia thingphun te hi humhalhturinka ngen che u a ni.
Green Mizoram Day hmanna pui ber hi Aizawl chhung hmun hrang hrang-ah thupui thlan bik nei zelin kan lo hmang tawh thin a. Tunah chuan thing phunna tur ramruak a awm tawh meuh loh avangte, kan kawngpui sir kawlh vel vul te tih hrin nante leh mitinte, he programme a zau zawka kan tel theihna turin kumin hian Thenzawl-ah, “ Thing phun la, Boruak thianghlim siam rawh”, tih thupui thlansa nen kan hmang dawn a ni.
Hemi Ni hi district tinah leh sub- divisionah te a hlawk thei ang bera hman theuh tur ani. He Ni denchhen hian Environment, Forests & Climate Change Department chuan a thlawnin mipuite hnenah thingtiak an sem dawn a,hemi bakah hian YMA Day lo awm turah pawh YMA pualin thingtiak sem a ni bawk ang.
Hetih lai hian sorkarin a ngaih pawimawh em em chu phun tam (quantity planting) lam aiin, puitling ngei tura phun uluk (quality planting) leh enkawl zui a ni a. Chuvangin Green Mizoram Day puala thingphun tu ten uluk tak a phun tur leh tha taka hung hi kan mawhphurhna a ni.
Khawvel pum puiah sik leh sa inthlak nasa lutuk avanga khaw lum zual ta em em te hi thing leh mau a tam thei ang berkanphun hiankanti zia-awm thei a ni. Chuvangin, kan hriselna vawnghimtu atan te, kan thupui - boruak nuam leh thianghlim kan neih reng theih nan te, leh kan mamawh hrang hrang min pe tu chu thing leh maute hi an nih avangin humhalhna kawngah ke pen theuh turin Zoram mipui zawng zawngte ka ngen nawn leh che u a ni e.
(Embargo : Not to be published before 11.6.2016)
