828/2025-2026

Champhai, dated 11th June 2025: Mizoram hmun dangte rualin vawiin khan Champhaiah District Level Committee on Green Mizoram huaihawtin 'Ruahtui khawl nan Thing I phun ang u' tih thupui thlan hmangin Green Mizoram Day vawi 27-na hman a ni. Green Mizoram Day 2025 puala hun hman hi Pu K. Zorammuana, Addl. DC Champhai chuan khuallian niin a hmanpui a ni.

Vawiina Green Mizoram Day pualin inkhawm tawi Conservator of Forest, Auditorium Champhai Bethel Vengah buatsaih niin Pu Lalbiakchama, DFO chuan kaihruaiin report tawi pein Green Mizoram Day lo pianchhuah dan a sawi a, Green Mizoram Programme hi Green Aizawl Programme tiin kum 1998-ah tan a ni a, Mizoram Sawrkar hmalaknain kum 1999 atangin Mizoram pumpui tuamchhuak turin Green Mizoram Programme ti a thlak a ni a. Hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm ta a ni tih a sawi.

Khuallian Pu K. Zorammuana chuan tun hnaiah ruahsur nasa in lei ti chein Mizoram dung leh vangah leimin chhiatna a thlen nasa hle a, hei hi a chhan ber nia lang chu kan thing leh mau kan ramngaw te kan tih chhiat nasat vang a ni tih a sawi. Chhiatna tam tak hi khuarel chhiatna ai mahin keimahni in siam chhiat hi a ni a, kan hmasawnna avanga kan thing leh mau tih chhiat te awm bawk mahse nakin hun dawn hauh lova tul lova kan tih chhiat a tam hle a, heng harsatna te hi kan pumpelh theih nan kan neihsa kan thing leh mau te kan duata enkawl a tul hle a a ni tih a sawi bawk.

Pu K Zorammuana chuan Mizoram chu kan vannei hle a, India ram hmun thenkhatah chuan thing leh mau an tih chereu nasat avangin an boruak a thianghlim tawk tawh loh avangin man chawia boruak thianghlim hipna hmun (oxygen bar) te hial an siam tawh a. Kumin Green Mizoram Day puala thupui tha tak kan neih 'Ruahtui khawl nan Thing I phun ang u' tih hi kan thinlungah vawng reng a, tuihna siam nan mai ni lo, boruak thianghlim siam nan te, leimin avanga harsatna te, sik leh saa ziawma kan khua a lo mawi a lo nawm zawk theih nan thing phun uar sauh sauh turin District mipuite a sawm a ni.

Vawiin Green Mizoram Day hmanna hunah hian kangmei ven kawnga hma la tha District Level Awards for Fire Prevention lawmmante sem chhuah a ni a. Kangmei veng kawnga khua/veng ti tha berah Dungtlang thlan niin, sumfai Rs 50,000/- leh Citation an dawng a. Dilkawn chu pahnihna niin Rs 30,000/- leh Citation an dawng a, Zawlsei chu pathumna niin Rs. 20,000/- leh Citation an dawng a ni.

Kumin Green Mizoram Day Champhaia thingphun hnatlang hi Mualbuhvum atanga Zote, Khankawn atanga Zotlang, Ruantlang atanga Mualkawi, Mualkawi atanga Melbuk leh Melbuk atanga Zokhawthar te thlan a ni a, heng hmunahte hian Planting Agency hrang hrangten thingtiak 1643 phun niin nikum lama thingphun thawmthat ngai te thawmthat a ni bawk.

Vawiin Green Mizoram Day pual hun hmanah hian District Level Committee on Green Mizoram member-te, Sawrkar Department hrang hrang thawktute, NGO, VC te leh zirlaite an tel a ni.