819/2025-2026

Siaha the 11th June 2025: Vawiin khan Ministry of Housing and Urban Affairs (MoHUA) ruahman angin, Green Mizoram Day denchhena AMRUT Mitra (AMRUT leh DAY NULM tangkawp) hnuaia Thingphun Runpui: ‘Women for Trees’ campaign chu Pu VT Martin Vabeiduakhei, President Siaha District Football Association (SDFA) chuan District Playground-ah khuallian niin a hawng.

Khuallian chuan Green Mizoram Day denchhana hun hmanah thu sawiin thing phun mai piah lamah thing phun sa chawmnun a pawimawhzia a sawi a, sawrkar laipuiin thing phun tam kawnga hma hruai tura a ruat, hmeichhe Self-Help Group (SHG)-te chu he hna thawk tur hian an tha tawk hle tih a sawi a ni. 

Pi Oasis Syuhlo, District Manager, NULM chuan kalkhawmte lawmna thu a sawi a, sawrkar laipuiin he campaign a duan dan leh department hmalakna leh hmachhawpte a tarlang a, SHG member thlanchhuah 12-te hnenah thingphunna tura an mamawhte a sem nghal a ni. He hunah hian SHG member-te bakah UD&PA department leh DFA memberte  an kalkhawm a ni.

He Thingphun Runpui: ‘Women for Trees’ campaign thupui chu ‘Ek Ped Maa Ke Naam’ niin ‘Nu Hmingin Thingphun Pakhat’ tihna a ni a. UD&PA Department-in a ruahman dan chuan he ‘Women for Trees’ programme-ah hian SHG  member 24-ten thingtiak 50 an phun dawn a.  SHG member-ten thingphun hi an enkawl chhunzawm dawn a ni.