808/2025-2026

Siaha the 11th June 2025: Tukin khan MADC Forest Hall-ah District Level Committee on Green Mizoram leh District Hub for Empowerment of Women, Women & Child Development tangkawp buatsaihin Green Mizoram Day pualin hun hman a ni a, Addl DC Pu Abraham Beirazi Khithie chuan he hun hi kaihruaiin MADC CEM Pu M Laikaw chu Khuallian a ni. Kumin Green Mizoram Day thupui chu ‘Ruahtui khawl nan thing I phun ang u’ (Plant Trees and catch the rain) tih a ni.

Chief Executive Member Pu M Laikaw chuan Green Mizoram Day puala hun buatsaih ngai pawimawha kalkhawm mipuite chu lawmthu a hrilh a, kum hmasa lamahte pawh he Ni pual hian hun hman thin niin thing tiak tam tak phun a ni thin a, enkawl zui kawngah tan lak thar a tul hle a ti. Ram thang zelina a ken tel hmasawnna ruhrel ding tharte chuan ramngaw tam tak a tichhia a, ramngaw humhalh leh thing phun uar a tul a, mahni thing tiak phun te en zui a, enkawl chhunzawm a pawimawh hle a ti bawk. Hun lo kal zel tur leh chhuanthar lo awm zel tur atan rawngaw humhalh a pawimawh hle a, department kutah dah mai lovin Mipui vantlang pawhin tha taka an humhalh theih nan public awareness a pawimawh hle a ti a ni. ‘Green Mizoram siam tur chuan Green Siaha siam phawt a tul a, Green India thlengin kan siam thei dawn a ni’ a ti bawk. Ramngaw humhalh chu mahni mawhphurhna theuha la a, Siaha chu khawpui nuam leh thianghlima siam turin theihtawp chhuah tlanga, a enkawl zui kawngah tan la thar theuh thrin kalkhawm mipuite a sawm nghal bawk a ni.

Green Mizoram Day pual hian Kangmei chhuak tur ven kawnga thawk tha khua thlan niin lawmman pek an ni a, lawmman dawngtute chu:

1) New Laty - Rs 50,000/- leh citation
2) Chhaolo- Rs 30,000/- leh citation
3) Amobyu B- Rs 20,000/- leh citation

Heng bakah hian ‘Best media in fire prevention award’ pawh sem tel niin heng a hnuaia tarlante hi thlan an ni:

1) Moonlight Daily Newspaper- Rs 3,000/-
2) Voice Of Maraland - Rs 2,000/-
3) Tipa Express Daily Newspaper- Rs 1,000/-

Green Mizoram Day puala hun hmanah hian Rev Z Hrohmo chuan hunserh a hmang a, Chairman in lawmthu sawina neiin tukin hawnna hun hi tihtawp a ni.

Vawiin lamah Mizorama sawrkar leh MADC a department hrang hrangte chuan Green Mizoram Day pual hian Tisopi road, Tipi Ferry road ah leh SDFA ground-ah te thing tiak phunna an nei leh dawn a, heng bakah Office complex-ah te phun nghal a ni bawk ang. Vawiin programme-ah hian DC Pu VL Hruaizela Khiangte , Siaha SP Pu Manjeet Singh Sankhla, MADC Conservator of Forest Pu Thaly T Azyu bakah head of office leh sawm bik te an tel a ni.