Vawiin  khan Green Mizoram Sub Committee chu an Chairman Pu Lalthanzara hovin Chief Minister Conference Hall-ah an thukhawm a, member kal an tha hle.
Nikum 2010-a Green Mizoram hnathawh, thingphun nun that dan te thlirletin, Assam Rifles rama thingphun zahve dawn lai a nung tha hle a, hmun danga hma;lakna pawh a tha thawkhata hriat a ni. Assam Rifles rama thingphunte hi mi thenkhatin leipui an siam avangin harsatna a awm deuhva, A.R. hotute inthlak thin chuan harsatna tlem a thlen ve deuhva, mahse a tlangpuiin a lungawithlak hlein an hria.
    
Department tam tak hmalakna a hlawhtling tha hle a, thenkhat erawh chuan an thingphunte an enzui tha tawk lo deuhva hriat a ni a; Department tinin thahnemngai lehzuala mahni thingphunte enkawl theuh nise an ti.
   
Kumin chhunga Green Mizoram hmanna hmun atan Mizoram University ram thlan a ni a, a hun  tur chu State Level Committee hnenah rawtna siam nise, Khuallian chungchang pawh Central Minister emaw, Chief Minister emaw nise tih a ni.
   
Chhungte hriatrengna thingphun duh tan hun hawn leh a ni a, chumi senso atan thing pakhat phuna enkawl man atan Rs 1500 hi beitham deuhva hriat a ni a, Rs 2500-a tihsan rawtna State Level Committee kuta thlen remtih a ni a. Thingphun duhte tan hmun tha leh ualau, remchang tak lo ngaihtuah turin DFO Aizawl ruat a ni.
   
Fire Prevention Award chungchang: Green Mizoram Sub Committee leh Fire Prevention Committee hi kawng tam taka hmalakna inthlawp tlat a nih avangin Fire Prevention Committee thutho nghal a ni a. District leh Village Level-a ram tikang tlemte hnena Lawmman siam leh thaa hriat a ni a.  Green Mizoram huna lawmman sem tur a nih avangin hemi hma ngeia endik turin heng mite hi ruat an ni :
1.    Aizawl District endiktu atan SENVA aiawh,
2.    Champhai District endik turin MUO aiawh,
3.    Kolasib District endik turin STAM aiawh,
4.    Serchhip District  endik turin CEP
5.    Lunglei District endik turin  CYMA aiawh,
6.    Lawngtlai leh Saiha Districts endik turin AMFU aiawh,
7.    Mamit District aiawh endik turin ASEP aiawh te tirh nise tih a ni. Anni hian a rang thei anga lo bawhzui tura beisei an ni.
   
Chanchinbu-a ram kang tur venna lama chhuah thate hnena lawmman pek leh tum a ni  a; nimahsela, Chanchinbu lar tham deuh leh lian deuh, copy tam deuh, Mizoram mipuiten an hriat thamte zinga mithlan thiam nise tih chu Committee duhdan a ni a; lo endik turin Pu R. Vanhnuaithanga, DD, IPR leh Pu Lianzuala DFO te ruat an ni.