851/2022-2023
Aizawl the 10th June, 2022 : Vawiin khan Rangvamual BSUP-ah Green Mizoram Day denchhenin Legal Awareness Campaign neih a ni a. He hunah hian naupangte chanvo (rights) chungchangah zawhna (questionnaire) siam a ni a, a thupuiah 'Reaching the unreached, interacting with and observing children /adults in the BSUP Sector' vuah a ni.

Green Mizoram Day puala Legal Awareness Campaign neih tak hian a tum ber chu naupangte dikna chanvo te ngaihthah sak an ni em tih leh naupangte chu tihnawmnah an ni em tih te, naupangten an dawn tur ang hamthatna an dawng em tih hriat sak tura zawhna siama zirchianna buatsaih sak a ni a. He hun hi State Legal Services Authority leh Government Mizoram Law College student thenkhat, internship ti mekten a huhovin an buatsaih a ni. Rangvamual BSUP-ah hian chhungkaw hrang hrangte inang lo tak tak leh tunhmaa la chengho ngai lote bakah hmun hrang hrang atanga he hmun pan khawm an nih avangin dan leh hrai hi a tangkai lehzual tura beisei a ni.

Sawrkarin mi harsate tan a thlawna chenna tur hmun a siam sak BSUP-ah hian naupangte pual bik dan leh hrai inzirtirna neiin Pu R. Vanlalena, MJS, Member Secretary, State Legal Services Authority chu Resource Person niin 'Dan leh Hrai' thupui hmangin a zirtir.

Vawiina Legal Awareness Campaign hi Pu K. Lalropuia, SLSA-in a kaihruai a; Pu K. Vanlalneihpuia, Govt. Mizoram Law College chuan lawmthu sawiin hun a khar a ni. He programme bakah hian Green Mizoram Day pualin thing tiak eng emaw zat phun a ni bawk.