252/2026-2027

Kolasib, 23rd April, 2026 : Vawiin chawhnu khan DC Conference Hall, Kolasib-ah Kolasib Deputy Commissioner Pu H. Dolianbuaia hovin Gyan Bharatam Mission (Mizoram) hnuaia hnam ro hlu (manuscripts) zawn chhuah leh vawn that chungchang ngaihtuahin District Level Committee an thukhawm.

He thutkhawmah hian Central Sawrkar-in India rama state zawng zawng leh district tinah Gyan Bharatam Mission kalpuia, National Manuscript Survey neih tura a ruahman bawhzuiin he thutkhawm hi buatsaih a nih thu tarlan a ni. He mission hnuaiah hian Kolasib District Level Committee (DLC) pawh din a ni a, district chhunga hmalak dan tur tlangpuite sawiho a ni.

Thutkhawm hian Kolasib District-a Gyan Bharatam Mission Nodal Officer atan Pu Chinlianmanga, Election Officer, Kolasib chu a ruat a. Field survey hna lo vil leh buaipuitu (single point of contact) District Coordinator atan Pu Lalremliana, Asst. Professor, Govt. Kolasib College chu ruat a ni bawk.

Gyan Bharatam Mission pawimawhna vantlang mipuiin an hriat chian theih nan leh a tam thei ang ber manuscript lakkhawm a nih theih nan awareness campaign uar taka kalpui nise, tiin an rel a.
Kolasib District huamchhunga manuscript zawn chhuah leh lakkhawmte chu District Nodal Officer leh District Coordinator te hriatpuina ngeiin, Gyan Bharatam mobile application hmanga uluk taka document leh geo-tagging ti chunga upload zel turin ruahmanna an siam a ni.