H&FW Department chuan thu chhuah siamin an department tih chhuah HRISELNA monthly magazine, November 2016 chhuaka phai sangha chungchang lo langin mipuite a ti thlabar chu pawi an ti a.

Formalin (Formaldehyde) hi sangha khawina lam (Pisciculture)-ah natna hrik laka sangha venhim nan hman thin a ni a. Hetih rual hian sangha thawnchhuah/hralhchhuah tur vawnthatna (Preservative) atan chuan hman phal a ni lo. India ram hmun hrang hrangah sangha thawn chhuaka sumdawng ten a vawnthat nan formalin hi an hmang thin tih sawi a awm avangin sawiselna pawh a awm fo thin a.

Mizorama lo lut phai sanghate hi formalin hmanga sawngbawl vek an ni em tih hriat a ni lo va. A nunga khawi an nih laia formalin hi kai pawh an ni thei bawk ang. Food Safety Cell, H&FW chuan kan ei leh in reng renga thil thalo leh hlauhawm awm palh theite bawhzuiin a vil reng a. Hriat theih chinah sangha a ni emaw, thlai lam thil a ni emaw mihring tana hlauhawm khawp formalin pai hmuh a la ni lo va. Thil hlauhawm leh fimkhurna tur chi chu mipuite him nan puanzar a ni thin a. H&FW department chuan Hriselna Magazine November 2016-a thuziak lo lang avang hian tumah chiai lo turin a a ngen a ni.