NLUP hnuaia haircutting trade thlangtu te tan vawiin khan lumet thutna revolving chair sem a ni a. Sem chhuahna inkhawm, NLUP Implementing Board(NIB) conference hall-a neih ah Pu H.Liansailova, NLUP Nodal Minister chu Khuallian niin beneficiary te hnenah NLUP tanpuina hi a sem.

Thu sawiin Pu Liansailova chuan Aizawl khawpui chhunga haircutting trade thlangtu mi 70 te chu hmanraw changtlung zawk nena thuam an nih mek lai hian nasa zawka thianghlimna kawngah tan la turin a chah a. Natna inkai chhawn theih lak ata fimkhur nan leh customer te pawh hip turin lumehna hmanraw hrang hrang, intuamna puan, towel, samkhuih leh thil dangte pawh a thianghlim tur a ni, a ti a. Hemi kawnga lumettu ten hma an sawn poh leh an sum lakluh a pung ang a, chu chuan Mizoram sum dinhmun a chawi kang bawk dawn a ni tiin, NLUP atanga tanpuina pek an nih chhan ang ngeia lumeta eizawnna hmel thlak danglam thei tura  tan la thar turin a fuih bawk a ni.

Lumehna chair semna inkhawm ah hian NIB Vice Chairman Pu P.L.Thanga chuan Aizawl khawpuia cheng mihring nuai 2 vel zinga a chanve chuan thla tin lu an met a, sam colour leh dye man te nen thla tin lumehna dawra sum sen zat chu nuai 5 vel a ni, a ti a. Haircutting thlangtute chu sum lakluh tama inel tura fuihin hnamdang eng emaw zatin Mizoram-ah lumeta eizawnna hna an la thawk chu Mizo thalai ten tlawmah lak a hun tawh tak zet a ni, a ti. Thusawitu dang Pi Esther Lalruatkimi, Secretary Industries department chuan India ram pumah Mizo thalai te anga lumet thiam an awm lo, a ti a. NLUP hnuaia haircutting eizawnna thlangtu te tan sorkar lam chuan a mawhphurhna a hlen a, tha taka tih hlawhtlin chu tanpuina dawngtute mawhphurhna a ni, a ti.

Vawiina haircutting chair sem chhuah hi Delhi based company siam DC147 model niin pakhat Rs.10000/- man zel a ni a. Mi 62 hnenah pek chhuah a ni.