.

Vawiin khan Home Minister Pu Lalchamliana hovin Chief Secretary leh Home Department hotute, Aizawl District Bawrhsap leh Aizawl City Local Council Association hruaitute, CYMA hruaitu te nen SAD Conference hall ah an thukhawm a. Kumin Krismas vuakveta dan leh thupek kenkawh dan thlir letin kumthar vuakveta halpuah leh halmawi khapna thupek awmsa khauh taka kenkawh dan tur an sawiho.

Covid hri leng mek avangin boruak tih bawlhhlawhin mihring nunna atan thil pawi a thlen theih avangin halpuah leh halmawi khapna thupek hi kum dang aia khauh lehzuala kenkawh rel a ni a. Hei bakah hian Sky-lantern pawh, kangmei a tihchhuah theih bakah power supply a tih khaihlak thin avangin zawrh leh hal khap a ni.

District tin magistrate ten Cr.Pc Section 144 hmanga halpuah leh halmawi chi hrang hrang zawrh leh hal khapna thupek an chhuah tawh angin he khapna thupek bawhchhia te chu IPC 188 hnuaiah mihring himna leh hriselna ti derthawng thei thil an tih avangin thla 6 thleng lung in tantir emaw, cheng sangkhat thleng chawitir emaw, lung in tan leh pawisa chawitir kawp theih an ni a; thupek bawhchhiate chu ngaihhnathiamna awm lova an chungah hremna dan kenkawh ni se, tiin vawiina Home Minister hova meeting ah hian rel a ni a. Halpuah leh halmawi haltute mai bakah an halna hmun leh in neitu te thlengin hrem theih an ni dawn a ni.

Mizoram sawrkar, General Administration Department(GAD) in a lo tih chhuah tawh angin a bikin sawrkar hnathawkte chu halpuah leh halmawi khapna thupek te hi zawm ngei tura hriattir an ni.

Kumthar vuakvetah mipuite himna atan Police duty te indah belh a, magistrate duty pawh ruat belh turin ruahmanna siam a ni a. Halpuah, halmawi leh Sky lantern khapna thupek hi khauh taka kenkawh tum a nih avangin mitinin khapna thupek hi ngai pawimawh a, zawm theuh turin vawiina Home Minister hova meeting chuan mipui te an ngen a ni.