3476/2022-2023

Dated Serchhip, the 3rd February, 2023: Vawiin khan Thenzawl SDO Civil Conference Hall ah DC Serchhip leh SDO(Civil) Thenzawl hmalaknaa Ministry of Tribal Affairs aṭanga cheng nuai 65 an hmuh hmanga Thenzawla puantahtute tana training and sensitization programme on Restructuring of Handloom Cluster in Thenzawl Project an buatsaih kharna hun chu Pi Nazuk Kumar, IAS, Serchhip Bawrhsap hova hman a ni.

Puantahtute Training kharna hun hi Thenzawl SDO (Civil) Pi V. Lalmuanpuii chuan kaihruaiin, Serchhip Bawrhsap Pi Nazuk Kumar chuan Training hlawhtling leh hlawkthlak tak Puantahtuten an nei thei chu lawmawm a tih thu a sawi a. Trainee te chu an thil zirchhuahte midang tana ṭangkai taka hmang zui tur leh fashion industry-ah thil a inthlak zung zung avanga anmahni pawh chutiang kawnga inthlak danglam thiam a, mahni irawm chhuak hman ṭangkai thiam turin a fuih a ni.

Puantahtute tana Training hi Ni 9. 1. 2023 khan Serchhip Bawrhsap hian a lo hawng tawh a, Puantahtu thlanchhuah mi 25 te hnenah ni 26 chhung zirtirna pek an ni. Puantah Quality leh design ṭha leh mawi zawka neih dan tur te, puantah chhuah thlalak mawi zawka social media lama phochhuah dante leh kawng hrang hranga an hmasawnna tur zirtir an ni a. Training chhuak te hnenah hian TA/DA  pek an nih bakah, Certificate leh Puantah khawl pek vek an ni.