557/2026-2027

Lunglei, 2026 Ṭomir thla ni 15: Vawiin khan Hausiampa Hall, Haulawngah 40 Days Healthy Lunglei Campaign hun hman niin, hriselna chungchang leh LushAI Healthy Lunglei App chungchang inzirtir a nih bakah, a thlawnin kal khawmte hriselna dinhmun endiksak an ni.

YMA Haulawng Branch President Pu C. Lalngaizuala'n hun kaihruaiin, Lunglei Sub-Deputy Commissioner Pu Lalruatfela'n 40 Days Healthy Lunglei Campaign chungchang a sawi zau va. Sawrkar aṭanga hma lakna ṭha tak tak awm ṭhin chu a dawngsawngtu mipuite'n ṭangkai taka hman thiam a ṭul thu sawiin, Civil Hospital Lungleiah Health ATM dah a nih thu leh a thlawna hriselna endik theihna a nih angin mipuite pawhin chhawr ṭangkai zel se ṭha a tih thu a sawi a. Hriselna kaihhnawiha tih tur leh tih loh turte ṭha taka zawm tur leh LushAI Healthy Lunglei App chu hman ṭangkai tum ṭheuh turin kal khawmte a chah.

Primary Health Centre (PHC) Haulawnga Medical Officer Dr PC Lalrinmawii chuan natna inkai chhawn theih loh (non-communicable disease) chungchang te, NCD laka inven dan leh nunphung hrisel neih pawimawhna te, hriselna atana tih tur leh tih loh tur hrang hrangte power point presentation hmangin a zirtir a. Data Entry Operator Pu K. Hmingthanmawia'n LushAI Healthy Lunglei (LHL) App chungchang sawi fiahin, application hman dan a takin a zirtir bawk.

He hunah hian Vanva Group huam chhunga YMA member-te bakah, kum upa lam leh zirlai mi 104 an kal khawm a. Medical Team te'n health screening buatsaih chhunzawmin, mi 83 te hriselna dinhmun endik a ni a. Kal khawmte hian a hmunah LushAI Healthy Lunglei App chu an mobile phone-ah an dah lut (install) nghal bawk.

40 Days Healthy Lunglei Campaign kalpui chhung hian YMA branch hrang hrang leh college-ah te hriselna dinhmun endikna (health screening) te, hriselna leh LHL App chungchang inzirtirna leh intihsiakna te buatsaih ṭhin a ni dawn a. Ni 40 chhunga campaign zawh hnuah App download tam leh hmang ṭhate hnenah lawmman siam tum a ni.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan https://play.google.com/store/apps/details?id=com.lushaihealthylunglei.android aṭangin leh iOS hmangte tan https://apps.apple.com/in/app/lhl/id6755673586 aṭangin download theih a ni.