HDFC  Bank Lunglei Branch thar chu vawiin  chhun dar 12:30  khan HPC Vice Chairman  Pu  Joseph Lalhimpuia\'n a hawng.

Hawnna inkhawm tawi HDFC  Bank Lunglei Chanmari a neihah HPC Vice Chairman chuan thu sawiin, Mizoram in harsatna lian tak a tawh te zing a mi pakhat chu Bank lem a ni tiin, hemi avang hian chhungkaw tam takin harsatna nasa tak an tawh phah a, Mizote kan hmanhmawh lutuk leh kan duham thin lutuk vanga hetiang Bank lem hmanga in bumna nasa tak a thleng hi a pawi hle a ni a ti. Khawvel huap pawh a hming tha, India ram a Bank rintlak ber te zing a miin Lunglei ah Branch an rawn hawng ta chu thil lawmawm tak a ni tiin, Lunglei  District mipuite ten an chhawr tangkai ngei a duh thu a sawia, thawktute pawhin mipui rawngbawl tur  an ni tih in hre reng se a duh thu a sawi bawk. Sawrkarin  Lunglei District  hmasawnna tur ruahmanna tha tak tak a nei thin a, sum leh pai pawh tam tak a luanglut ve mek a ni a ti a,  hmasawnna tur a sawrkar ruahmanna te lo sawichhe pawl an awm thin chu pawi a tih thu leh hetianga lo sawi chhe thin te awka hi mipui ngaihdan a nih a rin lem loh thu a sawi a, Assembly Session laia he hun hmang thei tura Chief Minister leh Speaker ten an remtih sak avanga a lawmthu a sawi bawk a ni.

Vawiin HDFC Bank Lunglei Branch hawnna ah hian Lunglei D.C Pu V.Sapchhunga pawhin thu sawiin, Lunglei in hmasawnna rahbi thar a nei leh ta chu lawmawm a tih thu a sawi a, HDFC Bank Zonal  Head, Debasis Senapati pawhin HDFC Bank kalphung tlangpui leh Mizoram a an hmasawn dan te a sawi bawk. Lunglei a hawn thar tak HDFC Bank Lunglei Branch ah hian Branch Manger hovin, thawktu 15 an awm nghal a ni.